كيف الشباب ....
قسماً بالله شي ببكي "حطين يعادل الشرطة"
والله هزلت , والله مافي شي بيشفع للتعادل ,ما حدا يقلي شباب و ماحدا يقلي المدرب
يعني كيف ما كان بيضل هدا حطين و الشرطة هو الشرطة يعني مفروض إذا بنلعب
فريق شباب حطين و بدون مدرب لازم نفوز عالشرطة .....
الله يرحم الأيام اللي كانت مباراة الشرطة و الوثبة و المجد و الجهاد...الخ , مبارة لإستعراض المهارات و تسجيل الأهداف ,كانت المباراة من أولها لآخرها لحطين و كانو يحلموا لو بهجمة علينا (بذكر مباراة إلنا مع الجهاد عام 97 بعد 35 دقيقة لقطع فريق الجهاد نص الملعب أول مرة)كانت مباريات كل الفرق معنا باللاذقية رعب و على الاغلب خسارة , حتى لما كنا نخسر كان الفريق يهاجم كل المباراة ماكان عنا شي اسمو خطة دفاعية...
أما هالأيام بنجيب كول و مندافع , يعني معقول أنو بعد مانجيب كول على الشرطة نرجع ندافع و فريق الشرطة مطرود منو لاعب ,و نام الفريق كلو حتى صحي آخر ربع ساعة بعد ماتذكروا أنو خسرانيين مع الشرطة؟؟؟؟؟؟
حتى لما صحوا كان الورقة الرابحة " أحمد أبو الريف" عم يضيع الفرص السهلة ورا بعض يعني أنا بتفهم أنواللاعب يكون مستواه سيء أو أنو يكون جيد و في مباريات كان سيء فيها, بس في شي أسموا مبادىء كرة القدم يعني التمريرو التسديد و التحكم بالكرة و" تسجيل هدف و أنت على بعد مترين من المرمى و الحارس نايم عالأرض" وبصراحة أحمد أبو الريف ما إلو علاقة بهالحكي....
بصراحة الموضوع ماعاد أنو شباب جداد أو المدرب لأنو بالنهاية هادا الموجود سواء لاعبين أو مدرب....
بصراحة النفس الحطيني المعروف ,المتعة الحطينية , الفريق اللي أمتع سوريا بالتسعينات ما بتوقع يجي متلوا لاعلى حطين ولا على نادي بسورية كلها....
و شو الحل ما بعرف أنا حالياً متشائم كتير و فايت بالحيط , و حسمت أمري تماماً ,مباراة تشرين ما رح أحضرا لأنو متشائم كتير و متوقع الخسارة و بصراحة تشرين كلاعبين احسن منا بكتير و انشاالله فريقنا بيغير صورة مباراة الشرطة....
الشي الحلو بالمباراة أنو السيد بيازيد عاد شوي لمستواه , أما الاحلى فهو اللاعب سليم خضرة الله يوفقوا و بتوقعلوا يكون سليم جبلاوي 2 , وانشالله منشوف عارف2 و جمال2 الخ ...
و شكراً..