أخطاء الحكام هي بدون منازع السبب الأساسي لنزع مونديال ألمانيا 2006 و لحد الآن ما في مباراة حضرتها إلا و كان فيها أخطاء فادحة من ضربات جزاء غير صحيحة غلى ضربات جزاء غير محتسبة إلى تسللات بالعشرات غير صحيحة و غير تكرار الإنذارات المهزلة و حالات بتستحق الطرد مرت كإنها غمامة صيف..
بيكفي فضيحة للفيفا خطأ الحكم الإنكليزي المعمي على قلبو و زادها فضيحة إنو معو تلات حكام حاشاكون متصلين لاسلكي معو و الكل بيفهم على بعضو و ما حدا عرف ينتبه و لا نبه الحكم الفاشل على التصرف الفاشل.. و الله كنت مفكر بس ببلدنا مراقبي المباريات بيشربوا متة و حكام التماس بيلتهوا بالجمهور.. عن جد يا جماعة ما حاسس بنكهة لهالمونديال و مرة بعد مرة عم تنسحب من كأس العالم الطعم و النكهة.. الله يستر ما يجي مونديال نلتهي عن مبارياتو بمتابعة برنامج أرضنا الخضراء أو مباريات دوري درجة تالتة..
عم تابع المباريات عالقنوات السويسرية و بالتعليق الإيطالي.. سألني واحد إذا كنت عم بفهم شي فقلتلو لأ ما عم بفهم شي غير "كرت أحمر, كرت اصفر, ضربة ركنية. جزاء, حرة, حلوة, قوية, خطيرة ومن هالكلمات الخفيفة يعني" و غير هيك ما بفهم يعني تحليل ما بفهم بس هيدا أريح من وجع الراس إذا طلع المعلق العربي معتوه و معو بلاهة و ما بيعرف لاعب الطيخ من لاعب البطيخ و بشكل عام معظم المعلقين العرب المجبورين عليهون من هالنوعية النادرة!!! حالة وحيدة رح تخليني تابع كأس العالم بتعليق عربي و هي إذا استلم الوجيه شويكي التعليق.. وقتها يستحيل ضيع على حالي لحظة وحدة من أي مباراة رح يعلق عليها و خصوصي إذا استلم كمان ستوديو تحليلي ربع ساعة بين الشوطين.. بالله عليكون هيك لعبة بتعليق الشويكي ما لازم يندفع فيها مصاري؟
25/06/06
النمط الخطي
