@(د. عمّار عوض) يتكلم عن هموم حطين والرياضة السورية ويجيب على الأسئلة (من الإمارات) @

[Saeedoo]

استقبلنا في مكتبه في أكادمية نادي الوحدة بأبو ظبي (الشهامة)
وأبدى ترحيبا" كبيرا" بنا
أنا وأخي وصديقي أبو ناظم
من خلال اللقاء وجدنا عنده حنين و محبة كبيرة لبلده وخاصة جدا" لناديه (( حطين))
ساعتان ونصف معه مرو كأنهم عشر دقائق
وكأنه كان ينتظر أحد" يفاتحه بموضوع حطين ليفتح قلبه ويتكلم مطولا" وكثيرا" عن حطين والرياضة السورية
حاولت أن أنقل كل تفاصيل المقابلة ...وأعتذر لطول المقابلة لهذا السبب
كما فضّلت أن أكتبها بلهجته المحكية لتصلكم بأقرب صورة أراد التعبير بها

أرجو من الجميع قراءة المقابلة أو بعضها قبل الرد




لقطات من اللقاء :

1. حلمي ليس الدوري أو الكأس أو أي بطولة لحطين , بل أطمح أن نصنع (قدسيّة نادي حطين)
2. تركت طب الأسنان وتابعت دراسات عليا في الإدارة الرياضية والتدريب حبا" بكرة القدم .
3. لم أحصل على أي كرت أصفر خلال مسيرتي كلاعب رجال.
4. عودتي للوطن واردة بعد عدة أشهر وارتباطي بأي نادي مرهون ببعض المقومات والشروط التي استثني منها ناديي الحبيب (حطين)
5. (نزار محروس+محمد قويض+فجر ابراهيم ) أفضل ثلاثة مدربين سوريين حاليا" بنفس الدرجة على اختلاف مجال العمل .
6. ملاعبنا للأسف أصبحت (سجون مفتوحة), نحن نفتقد الروح الرياضية وللإعلام والصحافة دور سلبي في هذا الموضوع !!.
7. أنا أتنفس حطين وقد تستغربون أني على اطلاع على أدق التفاصيل الجارية فيه حتى اليوم.
8. سليم خضرة يمتلك الكثير وله مستقبل مشرق - أركان مبيض عليه الإجتهاد ليبدع.

أترككم مع اللقاء وأتمنى منكم القراءة قدر الإمكان :

[Saeedoo]

البطاقة الشخصية :
عمار عوض لاعب حطين والمنتخب الوطني
دراستي طب أسنان متخرج 1991 بعد ما خلصت جامعة سافرت على فرنسا لمدة 3 سنين وبعدها سافرت على كندا لمدة 7 سنين بين كندا وأميركا
تابعت دراسات عليا بالإدارة الرياضية والتسويق + دراسات عليا بالتدريب

دربت بفرنسا بنادي تولون لمدة سنة بمركز تأهيل الناشئين
وبكندا استلمت برنامج إعداد كرة نسائية لمدة 3 سنين وحصلت على أفضل مدرب بكندا للجامعات لموسمين ...
استلمت مدير فني للكرة النسائية ومدرب أول لفريق الرجال بجامعة كونكورديا يونيفرستي ...دربت بنادي أسمو( هاميلتون تندر)
منتخب برمودا أيلند لناشئين لمدة 8 أشهر قضيتهم ببرمودا أيلند..
وحاليا" منذ أربع سنين مدرب بأكادمية نادي الوحدة للناشئين واللي نحنا من مؤسسينها اللي بتشرف على الفئات العمرية من 14- 18 سنة

ممكن ناخد فكرة عن الشهادات الرياضية اللي حصلت عليها دكتور أبو الياس
أي تكرم ..موجودة عندي بالـ ( CV) السيرة الذاتية إذا بتحب أرسلك ياها

والله ياريت ؟

الشهادات التدريبية الحاصل عليها :

International Coaching License, under the guidance of the Football Association of England – Lilleshal National Centre of Excellence, August 2006.
AFC Football Conditioning Course, under the patronage of Asian Football Confederation – Malaysian, February 2003.
Soccer Advanced National Coaching Diploma, under the patronage of NSCAA – Penn State University, June 1999.
Soccer National Coaching Diploma, under the patronage of NSCAA – Nova Southeastern University, January 1999.
Advanced Soccer Coaching Diploma, under the patronage of Arab Football Federation – Al-Hussein University, May 1996.>

- دكتور بذكر أنك كنت مع المنتخب الكندي للشباب ببطولة كأس العالم للشباب بأبوظبي ؟
صحيح أنا كنت بسوريا وقتها والتحقت بالمنتخب الكنتدي بدعوة من المدرب الي كان بتربطني فيه صداقة من كندا .. طلب مساعدتي بحكم أني بتكلم العربي على أن كون مساعدو خلال هالبطولة ...
ومن خلال تواجدي مع المنتخب الكندي صار التعارف على نادي الوحدة والإرتباط اللي استمر لهلق
فينك تحكيلنا عن تجربتك بنادي الوحدة
بتوجيهات من الشيخ سعيد بن زايد من الشخصيات التي تعشق كرة القدم ...كان عندو رؤية ثاقبة بافتتاح أول أكادمية بالإمارات وهي أكادمية نادي الوحدة وكان لي الشرف بأني ساعدت بتأسيسها ..مدير الأكادمية هو الكابتن عبد الرحمن جمال (سوري أيضا") مقيم بالإمارات من 28 سنة بوجهلو تحية كبيرة أيضا" وعن طريقو اشتغلنا بهالموضوع ...
والأكادمية 18 -13 سنة من هالأعمار وهم مقيمون هون بالأكادمية ...كمدرسة داخلية موجودة هون ...لا تقتصر فقط على كرة القدم بل تتعداها لكل مجالات الحياة من تعليم أمور العلاقات العامة التغذية والصحة ودروس التقوية وإلخ ...
عملنا فيها من أربع سنوات وإلى اليوم و أول جيل أنتجناه السنة الماضية من الشحي وحمدان الكمالي وياسر عبد الله محمود خميس وعبدالله النوبي ...وحاليا" في جيل تاني مهم جدا" بإذن الله نرفد به نادي الوحدة والمنتخب...وأنا بحكم سفري المتكرر و اللغات اللي بتقنها (انكليزي وفرنسي) واختلاطي بعدة حضارات بفرنسا أو كندا وأميركا وغيرو.., حاولت أنقل أساليب وأفكار التدريب الغربية للأكادمية هون لنوصل للشي الأفضل وننجح بالعمل اللي عمنقدمو
(كام طالب بالأكادمية)
65 طالب ...أكلين شاربين نايمين طبعا"..

وكيف الدخول للأكادمية بكون بالإنتساب أو أنو أنتم تبحثو وتحاولو جذب المواهب؟
هو في عدد كان موجود وبينتسب بشكل إرادي وبدأنا بالعمل معهم وبنفس الوقت عنا مجموعة من الكشافين بحاولو البحث عن المواهب الشابة لضمها للأكادمية وتطويرها وأحيانا أنا والكابتن عبد الرحمن منعل جولات واختبارات لبعض الطلاب ومتل ما ذكرت تركيزنا الأساسي ليس فقط كرة القدم بل لتعليم جميع أمور الحياة من التهذيب والتصرف والأكل وطرق النوم و .. و ..إلخ ولو أنو في أمور جديدة وغريبة عن الأولاد ولكن الحمد لله منقدر نوصلها للكل

عن الرياضة السورية :

علاقتك بالقائمين عالرياضة بسورية وهل حصل أي طرح بفكرة الإرتباط بمنتخب كتدريب أو غيرو أو حتى النوادي؟
علاقتي جيدة جدا" بهم بالإتحاد الرياضي والقائمين يعني وبشوفهم هون لما بيجو أو لما بروح عسورية ...بس ما ورد أو انطرح الإرتباط معهم من طرفي لأنو مافكرت قبل بهالشي باعتبار الحمد لله وضعي ممتاز هون وكنت ملتزم بعقدي وبتعرفو أنتو يعني التدريب بالنسبة إلي صار كمان مهنة غير الهواية والمحبة ...وبتعرفو أنتو من خلال وجود القوانين والروابط بأنظمتنا يعني بدو يصير المدرب يكون عندو مصدر رزق تاني ..بس بشكل عام علاقتي فيهم ممتازة وعلاقتي كمان بالمدرب فجر ابراهيم مميزة وعلى تواصل دائم ومنتناقش بكتير أمور.

شو رأيك بمستوى الدوري السوري حاليا" مقارنة مع الدوري على إيامكم ؟

حاليا" فارق التغطية والتقنية ونقل المباريات والتصوير ..يعني العامل التكنلوجي أثر إيجابيا عالدوري بس كمستوى ما بعتقد في فرق كبير لا بل قبل بتحس كانت المنافسة أقوى بين فرق الدوري يعني أي فريقين لما يلعبو مع بعض ما بتقدر تعرف النتيجة حتى نهاية المباراة ...اليوم في مباريات بتقدر تتوقع نتيجتها ولو لنسبة 70 – 80 % لأنو صار في شوي طوابق بالفرق

المتاهات اللي صارت بين المدرب السوري أو الأجنبي ..
بغض النظر عن التفاصيل الصغيرة ومين هو المدرب الأجنبي بعتقد كلشي صار بضر بمصلحة الكرة السورية ...سواء إجى وسواء راح ..فهالبلبلة بكل تأكيد عملت مشاكل ...وبالنهاية إذا نحنا ماقادرين ناخد قرار بتعيين مدرب للمنتخب ...بقصد أنو لحد الأن مافي جهة قادرة تاخد قرار بتحديد المدرب سواء كابريني أو فجر أو غيرو ..فهذه هي الطامة الكبرى
في أمور كتير غلط بالنظام الإداري عنا بسورية لتسيير اللعبة ....

نحنا بعيدين كتير عن الإحتراف بسورية بنوادينا ...فرضا" أنا بدي أعمل معسكر ببلد بعيد باليابان أو غيره لازم موافقة وكلام وأخد ورد ...بدي بيع فرضا" حقوق البث لمباريات فريقي ..ليش ما بحقلي ..!! بدي وقع عقد رعاية مع شركة بتخصني...بدي غير أسعار الدخول لمبايراتي ...كل هالأمور لازم تقرر فيها إدارات النوادي المحترفة كمان ...ويننحنا من الإحتراف قصة كابريني كلها سرقة ومافي شي واضح ...المفروض إتحاد الكرة هو المسؤول عن الموضوع بدو كابريني بجيب كابريني ..بغض انظر عن مين وشو ...بس كل هالقصة عمبتضر بمصلحة البلد وبمسيرة كرة القدم بالبلد بعدين مافي عقد بينكتب لـ 7 سنين ...ومافي مدرب ممكن يقول أنو بدي طالع منتخبكم لكأس العالم 2014... مثلا" أنا ممكن أوعدك أني أعمل النادي وظبط النادي (حطين) خلال كام سنة ..بس مافيني قول بدي أخد بطولة الدوري..!! بقول أنو بنافس على بطولة لدوري معقول بس ما أنو بدي أخد البطولة فورا" !!

أفضل فريق بسورية حاليا"
الكرامة والإتحاد
وأفضل فريق بعتقد حلو الشغل فيه لأنو عندو عناصر مميزة هو المجد ...وميزة أنو ما عندو جمهور كبير>لذلك ما بيشتموه
شو رأيك بالمدرب عماد دحبور بالمناسبة ؟
عماد مدرب جيد جدا" وأنا من الناس اللي رشحتو على حطين بداية الموسم

(سؤال إعتراضي) بس غلط بلعبة تشرين بالتبديل؟
هو ما بتقدر تقول غلط أو ما غلط ...على فكرة أصعب شي بالتدريب هو التبديل خلال المباراة خاصة إذا كنت متأخر بهدف والنتيجة متقاربة..لأنو ممكن يكون اللاعب اللي عالخط كويس كتير وأنت حطيت أمل عليه ونزلتو بس للأسف كان غير موفق ولم يؤدي ...أي لاعب بالعالم ممكن يمر بأوقات لا توفيق ...متل ما أنت بالتشكيلة ممكن الـ11 واحد في واحد أو اتنين غير موفقين ..ممكن تنزل واحد عالخط يكون ما متوفق يخرب الدنيا وممكن يتوفق ويجبلك المباراة ...لذلك التبديل موضوع صعب للغاية خصوصي لما تكون متأخر بهدف.

مين اللاعبين اللي بترتاح للعب معهم
خالد حكيم + بشار حسن ..بالإضافة لعبد الناصر حجازية
خالد حكيم وبشار لانو نشأنا سوا و حتى أني حتى بالحياة العملية كتير الخلطة معهم وخالد بقدرو جدا بالحياة والعمل

ولاعب كتير بتقدرو :
سامر حاج عمر

</SPAN>

[Saeedoo]

عن حطين ..

شو بيعنيلك حطين
ما رح قول أنو حطين كلشي بحياتي و بيتي الأول أو غيرو
بس بصدق حطين المكان المفضل اللي بشعر فيه بالراحة فعلا" بيكفي خبركم أني مهما رحت أو سافرت وأين ما كنت لما برجع عاللادقية وبعد ما شوف الأهل لازم أنزل وروح عنادي حطين أشرب كاسة شاي عند أبو صطيف دكر...وأخبار حطين ومتابعتو أبدا ما بتنقطع عني مهما صار

أنا عشت حياتي كلها بحطين وعندي حطين ما بس نادي من قبل وحتى الأن ...أنا مغترب تقريبا" من 1991 و رحت على فرنسا وبعدها على كندا وحتى لما كنت هنيك كل نهار جمعة عندي تلفون طويل مع أبوصطيف دكر بالنادي وحتى الأن بيستغربو مني الكل أني بعرف كل التفاصيل الصغيرة والكبيرة بالنادي ولما بنزل عاللادقية بعد ماشوف أهلي وأقعد معهم شوي لازم إلي نزلة عالنادي ...وحتى مع رئيس النادي سليم سبع الليل تلفوناتي معو لاتنقطع ..بشكل شبه يومينحنا نفتقد باللادقية بشكل خاص لـ (قدسية النادي ).. عندنا ممكن تسميه مقر للفريق واللاعبين والإدارة ومرتع لمين ما كان بيحكو فيه وبيعملو تكتلات
نحنا نفتقد لكتير من مقومات وأساسيات النادي لحتى نفكر ببطولة دوري أو بمنافسة لازم بالأول نخلق قدسية النادي اللي أنا بحلم فيها من زمان ..لازم النادي يكون إلو هالة حولة ويكون أكبر من أنو مين ما كان يحكي ويخرب فيه ..وبرأيي لسا نحنا بيعيدين عن أنو ناخد دوري بكل نوادي اللادقية بالظروف الحالية

شو شعورك لما بفوز حطين :

اسألني شو شعوري لما بيخسر حطين بتضايق وبنقهر بشكل غير معقول ...الفوز دوما بحس أنو شي طبيعي وأحيانا بتضايق من الفوز لما بكون إجى بشكل مش مظبوط أو بدون أداء جميل ...ولأنو الطريقة اللي عمنمشي فيها غير سليمة أبدا" وأنا ما مبسوط فيها ...
بس أنت لما بتسألني أو منفتح سيرة حطين ..هالشي بخليني أنسى الدنيا كلها ...حتى أنو كل الأصدقاء هون بيتسألو أنو ليش لسا متمسك ومتابع لهالذكريات ...خلص أنت ابتعدت وأنسى هالأمور...بس للأسف ما بقدر..
لذلك متابعتي وحضوري كل ما بنزل عاللادقية لحطين شيء أكيد ودائم ...ولو أنو الفترة الأخيرة بأخر سنتين بفضل راقب من بعيد وكون بعيد عن التمرين خوفا" من أي كلام أو بلبلة ممكن تثير مشاكل عند مدربي الفريق ...بس لازم شوف أبو صطيف دكر والشباب القدام
علاقتي بالإستاذ محمد قدور جيدة كانت وشفتو مرتين خلال وجودو هون بالإمارات ...وحتى الإستاذ سليم أنا بتواصل دائم معو وبالإتصالات ومنتناقش ومنحكي بكل الأمور دوما" مع تبادل وجهات النظر

وقبل ما تسألني : في فكرة ترجع لحطين ...بقلك أنو بيوم من الأيام مرجوعي لحطين أكيد –

- أبو الياس هاد أول سؤال انسأل وأكتر سؤال تكرر عند كل الأعضاء الحطينية لذلك بتمنى منك تطمنهم أو بالأحرى تبشرهم بعودة قريبة لحطين ؟
أكيد بيوم من الأيام رح أرجع لحطين بس تكون الأمور مناسبة
- يعني هاليوم قريب أو بعيد كابتن ؟
والله في فكرة قريبة ممكن تكون
- في إشاعة بتقول أنو لما يخلص عقدك مع نادي الوحدة رح ترجع لحطين ؟
الصراحة انا اتناقشت مع الإدارة وحكيت أنو إذا قدرو يسيطرو عالوضع الإداري والتنظيمي أو يستمرو لمدة كافية بالإدراة ممكن أرجع لما اتأكد من هالشي الموضوع لا يتعلق بمصاري أو أي شيء تاني بس مهم جدا" موضوع الإستمرارية....لكون صريح معكم أنا بسوريا إذا قدر لي العودة والعمل الرياضي ,حطين هو النادي الوحيد اللي برجعلو بدون أي شروط ..يعني شرطي الوحيد أنو يعطوني منصب فيه أقدر أشتغل لمدة خمس سنين لست سنين مع صلاحيات كاملة إلي ,
غير لما تقلي درب نادي فلان أو علان بسورية ...رح يكون عندي شروط وقتية لأعمل معهم نتائج بموسم معين مثلا"
حطين أنا عمفكر فيه أكتر من هيك ..ما عمفكر فيه على نطاق كرة قدم وبس ..بل عمفكر يرجع نادي حطين اللي أنا بعرفو واللي أنا بحبو يكون ...سواء طلعت أول بالدوري أو طلعت الرابع أو حتى نزلت عالدرجة التانية ..بس بدي يكون نادي كامل ومتكامل ...اجتماعي رياضي وثقافي وكل شيء
فأنا المنصب اللي بحب أستلمو بنادي حطين هو مدير عام ( General Manager ) مع الإدارة الجديدة يعني أستلم كلشي بما يشمله المدربين من الصغار إلى الكبار ...وكون أنا مسؤول عنهم ومسؤول عن اللاعبين ومتابعتهم .
يعني مارح تكون مدرب للرجال ؟
مدرب للرجال موضوع أسهل بالنسبة إلي ...وممكن أستلمو بس أنا ما هيك طموحي ...ممكن أنا هلق استلم مدرب لنادي حطين وحط شروطي بأنو بدي اللاعب فلاني واللاعب فلاني ...بالإضافة للإمكانيات المادية المعينة إ اللي رح تلزملي لأقدر اشتغل وحقق النجاح المطلوب ..

بس أنا من نفسي حلمي أكبر من هيك مع أنو التدريب بدمي وبحب مارسو وحتى هون عممارسو مع أكتر من فريق وحتى بمساعدة المدربين و إعداد البرامج بس بنادي حطين بدنا شي أكبر وأهم من هيك
لذلك أنا قلت للإدارة الحالية بس يشعرو بالإستقرار وترتيب الأمور ...ما بدنا نشتري لعيبة ولا نصرف فلوس كتيرة على الفريق حاليا" وقلت هالكلام للإدارة السابقة ..هالمصاري كلها مهما بلغت ممكن نستغلها مثلا" بالبداية بتجهيز ملعب تدريبي لكرة القدم ..نحنا بحاجة لملاعب جاهزة باللادقية لناخد بطولة دوري أو ننافس عليه لازم يكون في مجموعة من المتطلبات هيدي أهمها ...مع الإجهزة الرياضية والترتيبات الملحقة وغيرها , لذلك لو اشترينا أحسن لعيبة بسورية والتاريخ بيشهد والأسماء حاضرة وكانو هاللاعبين ناجحين ومميزين مع أنديتهم واتفاجأتنا بأنو مستواهم انخفض واختفو مع حطين ..>
لاعب كرة القدم بحاجة لتمرين وتطوير وإذا نحنا لهلق ما عنا ملعب كرة قدم ...ما بعرف حسب معلوماتي هالشي...فأي مدرب رح يشتغل ضمن هذه الظروف , بدون ملعب جاهز أو معدات رياضية كاملة بكون عميحكم على نفسو بالفشل ..يعني أنا شفت نماذج من التدريب عنا وببعض النوادي بسورية عبارة عن ركض لفتين وتقسيم اللاعبين لفريقين للعب وصلى الله وبارك هادا إذا لقيت مكان تلعب فيه تقسيمة

لذلك برأيي أنو نحنا عنا لاعبين وعنا مواهب كبيرة بس ما عنا إمكانيات لتطوير هالمواهب والمحافظة عليها
وهيدا أحد الأسباب أنو نحنا ما أخدنا بطولة دوري أنو نحنا كنا عمنتراجع وشوفو أغلبنا بطلنا كرة القدم على بكير كلو هاد بسبب التمرين على الزفت و من عمر 16 -17 سنة ...وهلق أغلبنا ركبنا متكلسة من هالشي

لذلك منرجع منركز عالإمكانيات وشوفو الكرامة أو الجيش أو الإتحاد ونجاحهم وتفوقهم بالفترة الأخيرة من هالشي .. وليس لوجود مواهب نحنا منفتقر لها بالعكس عنا مواهب كتيرة ومميزة بس منفتقر لتطويرها والمحافظة عليهاللأسف اتحادنا الرياضي كان المفروض بمقابل عقود الرعاية أو نقل اللعب يدفعو نقود للنوادي ليصرفوها بإنشاء ملاعب ومعدات رياضية ...بالعكي عنا أول بلد بسمع فيه أنو الإتحاد بياخد فلوس من النوادي
حطين في فكرة أرجع ...وفي فكرة قوية كتير أنو أرجع لسورية بعد أربع أشهر تقريبا" ...بالرغم من وجود عرض لي من كندا وأمريكا بالإضافة لوضعي الممتاز هنا ..بس أنا حابب أرجع لأسمي يبرز بمكان معين ...وأنا حابب يبرز أسمي بحطين بعد ما برز كلاعب سابقا" يبرز حاليا" وبأمور أخرى..

يعني نبشر الحطينية بعودة أبو الياس؟
متل ما عمقول أنا مستعد للعودة ولكن ما مستعد لأعود وأحارب بنادي حطين يعني أنا ما ضد حدا ومابدي حدا يكون ضدي بالمقابل
كابتن ما معقول حدا يكون ضدك ؟
لأ في كتير ناس لما تواجدت بحطين من فترة وقفت ضدي وحاولت إبعادي عن النادي وكتير منهم بعدها اكتشفو أنهم كانو على خطأ وحكوني واعتذروا مني ,,, لذلك أنا مارح روح قاتل ولا حارب بس بدي تكون عودتي لرجع محبة النادي ومحبي النادي وأخلق الشي اللي حكينا عنو ... قدسية نادي حطين وهالة لنادي حطين ..
وليس مقر أو جمعية خيرية لرعاية لم شمل بعض الناس ولو كان من بينهم العاطلين عن العمل وغيرهم مع احترامي للجميع..
لذلك أول شغلة بطالب فيها ليست لاعبين أو فريق بل بدنا أرض نبني عليها ملعب ومقر ...مقر نادي ممكن نستقبل فيه ناس ويكون يليق بنادي حطين ...متل ما أنتو شايفين هون هالمقر لنادي االوحدة مع أنو مقر فرعي وليس النادي الأساسي
لا تواخذوني يعني أنا ما بقدر استقبل وفد من نادي عربي أو أجنبي بنادي حطين بوضعه الحالي ...يعني متل ما شايفين كرة القدم فيها علاقات واتصالات كبيرة والحمد لله عندي كتير علاقات ومعارف ممكن أخدم حطين فيها بس كيف وبأي منطق رح استقبلهم بنادينا ونحنا لا نملك المقر الملائم ولا حتى درع مناسب يمثل نادي حطين ..!!
فعلا" معك حق

- طيب ليش ما أخدنا بطولة دوري أبو الياس _ سؤال اعتراضي- يعني كذا مرة قربنا ولمسنا اللقب وبالأخر ما حصلنا عليه شو كان ناقصنا
نحنا ما كان ناقصنا شي فعلا" كلاعبين وكنا منافسين وماكنا أقل من أي نادي بهداك الوقت ...بس كان في عوامل عمتوقف بوجهنا ..وإذا رجعتو لللمواسم المذكورة بتعرفو كيف وليش صار هالشي وكان فريقنا وأسماءنا متألقة جدا" بس للأسف كل موسم صارت قصص وحكايات سواء من النادي أو من خارجه حالت دون وصولنا للقب , بس نحنا حتى الأن ما عنا المقومات المؤهلة كفريق متكامل للوصول للقب ..صح عنا لاعبين جيدين .. وإدارة يمكن جيدة ...والتدريب ...بس كل واحد عميشتغل لحالو

جمهور نادي حطين بيعشقو كتير ...وأكتر من أي نادي تاني وأنا شفت كتير من محافظات تانية ...بس مافي حدا بحب ناديه أكتر من نادي حطين

طلاع عالنادي وشوف المباريات ...أنا حضرت مباراة السنة الماضية بالملعب وقفت بنص اللعبة واستغربت على هالجمهور...شو صايرلوأنا كنت أطلع على نادي حطين طلع مرتي معي وطلع أختي وطلع عالم ضيوفي بالصيف نلعب سلة ونقعد وجو حلو كتير بياخد العقل ...روح هلق مين بيسترجي يطالع أبنوعالنادي إبنو عمرو 11 سنة مو مرتو وأهلو..برجع بقول نفس الكلمة ...نحنا ما عنا قدسية النادي ..نحنا منفتقد لها بحطين ...أنا بنادي فيها من عشرين سنة من إيام ما كان د. محسن الخير رئيس فرع الحزب.. طلعت وطالبت أنو لازم يكون في بطاقة عضوية للدخول عالنادي والسيطرة للي عميدخول عالنادي....لازم يكون النادي إلو هالة مو مين ما كان يدخل ويطلع ويدخل غرف المشالح ويدخل عالملعب أنا بدخل نادي حطين عغرفة الإدارة بشوف عالم مابعرفهم ومالهم شغل بشي بالنادي ...مين أنتو وشو عمتعملو بالنادي ...هاد الكلام ما معقول ياجماعة ...نادينا صار فرع ومقر ...وتجمع للفريق وغيره

شو الفرق بين اللاعب الحطيني عإيامك ولاعب اليوم؟

يمكن الفرق بيكمن بالشعور بالإنتماء للنادي والإخلاص للقميص ..كمان حقهم مافيننا ننكر هالشي ..هالإيام كرة القدم هي رزق اللاعب ومصدر عيشو ومستقبلو ..على إيامنا كان بالنسبة إلنا حلم هو الصعود لباص لاعبين حطين ..لذلك مافيننا نقارن ...الوضع غير ومختلف تماما وحتى بالنسبة لإلنا كمدربين الوضع مختلف ..العصر والزمن اختلف ..هالإيام والتكنلوجيا و نقل المباريات والتصوير اختلف والتغطية وكلشي
وشو الفرق بين جمهور حطين وقتها وجمهورو اليوم ؟
كمان في فرق كبير مش رح قول أنو الجمهور قبل كان أكتر ثقافة" أكثر وعيا" وكان ينبسط باللعبة الحلوة بغض النظر عن أي شي تاني , كان عندنا مشاكل بكل تأكيد ماحدا فينو ينكر هالشي وحتى الجمهور كان يعمل بعض المشاكل بس كمان كان في متعة ..بس حاليا" بتحس الجمهور عندو ضغط كبير وجاية يفرغو بالملعب ...يعني جاية ومشحون قبل اللعبة
طيب ظاهرة شتم اللاعبين والمدرب كانت موجودة عإيامكم؟
هلق طبعا" لايخلو الأمر وكل لاعب أكيد بتصير وبيسمع مسبة من الجمهور ...هلق أنا كنت أنسب أحيانا ..بس أنسب لما بغلط لما بضيع كول مؤكد مثلا" فيسبوك من قهرهم أنك غلطت وتكون مسبة عابرة وبتمرء وبتنتهي بعد نهاية المباراة وبينسى الجمهور هالغلط .. وهالشي حقهم أنا غلطت بباص أو أضعت كول .... بس هلق عمبيبدأ الشتم والسب قبل ما تبلش المباراة ...!! يعني لاعب لسا ما نزل بيبتدو فيه شتم أو المدرب ليش نزل هاللاعب والنشكيلة ليش هيك ..طب لسا ما لعب هاللاعب ..معقول تحكمو عليه بهالسرعة ...وأحيانا لاعب عميلعب بشكل جيد بينسب ...هاد غير اللي بينطروع على باب الملعب واللي بيحقدو عليه طول العمر وبصير لاعب مغضور عليه ..!! الموضوع فعلا" بحاجة لدراسة وانتباه يعني أنا شفتها بعيني ..لاعب لسا عمبيحمي عالخط ..بينسب ...ما معقول هالحكي وحتى الحكم قبل بداية المباراة بتقول عمبيشحنوه ببعض المسبات ..هالشي مامقبول أبدا"
مع إحترامي لجمهورنا ...أريغو ساكي بإيطاليا حكى كلمة من كام يوم بشوف أنها منطبقة كتير عنا وأنا نفسي كنت عمفكر بنفس الإطار من فترة
قال أنو(( الملاعب أصبحت سجون مفتوحة)) يعني كتير ناس بتحسها هربانة من السجون وعمبتفرغ شحناتها بهالملعب ...!!
للأسف ما حدا عميقبل فكرة الخسارة صاير عنا بسورية مو بس جمهورنا عمبحكي عن كل جمهور النوادي ..
جمهورنا لازم يعرف أنو بالنهاية ما بيقدروا 14 فريق ياخدو بطولة الدوري بالنهاية في فائز وخاسر ..
أنا فعلا" كنت بعتبر كرة القدم شيء مهم جدا" بحياتي ولأجل هالشيء تركت طب الأسنان ...بس كمان بعد ما سافرت للخارج على دول أوربا أو أميركا تعلمت أنو من المهم أيضا" تعرف كيف تستمتع بكرة القدم ..حتى لو خسرت المهم تكون عشت المباراة واستمتعت فيها ..وحتى لما كنا نخسر ببعض المباريات كانو يروحو الفريقين سوا ويسهرو ويحتفلو وينسو الخسارة والمهم أنهم أدو اللي عليهم
ولذلك بأوروبا كمثال بإنكلترا بتلاقي باأعياد راس السنة بتزيد المباريات لأنو الناس بتستمتع بكرة القدم ..بأوروبا بيعتبرو حضور مباراة شيء جميل وراقي يمكن متل الذهاب للسينما أو للمسرح ...أي شخص بياخد صديقتو أو أصدقاؤو وبروح بيحضر مباراة كرة قدم بالعطلة ليستمتع ويشاهد الشي اللي بحبو

أبو الياس : كانو يقولوا عإيامكم أنو أحلى شي بناي حطين خط الوسط يعني فعلا" اللي بدو يشوف لعب طابة حلو وتمريرات بالوسط يتفرج عفريق حطين ..بعدين ما عدنا نشوف هالتألق؟

يمكن لأنو مر جيل بهديك الفترة متفاهم ومتميز كمجموعة بوجود سامر حاج عمر وخالد حكيم وبشار حسن وأنا ...يعني المجموعة كلها بحد ذاتها ...لأنو بكل فريق بيتميز بفترات بجيل معين بيتألق مع بعضو وليس لاعبين منفردين..يعني كنا عايشين مع بعض وأكلين شاربين مع بعض ..يعني أنا كنت قبل ما يلعب خالد حكيم الطابة أعرف وين بدو يلعبها وامشي لعندها وكل واحد مننا كان يكمل التاني

فعلا" الجمهور كان يقول أنو عمار عوض عندو عيون خلفية يشوف فيها , كنت تستلم الطابة بالنص ويمين أو يسار بدون ما تلتفت
متل ما قلتلك كنا حافظين بعض لأنو ..وهيدا الفريق أخدنا فيه أول دوري شباب ويمكن لو توافرتلنا بعض الإمكانات التدريبية والفنية كنا عملنا شي كتير
طيب أبو الياس هلق كيف بتشوف وسط حطين أو كل فريق حطين بشكل عام ؟
يعني أنا أخر لعبة شفتها كانت لعبة الجيش (4-4) ..في لاعبين وفي مجهود باللعبة بس بتحس كل خط عميلعب لحالو ....مابنا نظلم الكابتن كيفورك لسا يمكن ما كان استلمهم بس بتحس الفريق أو اللاعبين عميأدو بشكل فردي بحت ...ما بتحسهم مجموعة وحدة أو إيد وحدة...يعني سليم خضرة لاعب ممتاز بس ما عميستغلوه بشكل جيد وضايع بمنطقة لحالو ...أركان منيح وعميجتهد بس كمان أخد ركن لحالو ..وهشام كمان ..يعني منشوف باص مثلا" بين هشام وأركان وأركان بردلو ياها ..بس هيك يعني مافي الجملة التكتيكية والشغل الفني بالفريق والحركة بدون كرة.

شو السر أنو نادي حطين خرج كتير مهاجمين متميزين جدا" يعني أخر 11 سنة 6 من حطين هدافي الدوري ؟

برأيي لخط الوسط بالفريق دور كبير ببروز اللاعبين عنا متل عارف والسيد وزياد شعبو ...طبعا" لاننسى موهبتهم بس كمان الشغل الكبير لخط الوسط من إيام خالد حكيم ومجموعتنا أول ما بدينا نلعب ع عارف والسيد كان عمرهم 16 سنة وبعدو سليم جبلاوي كمان بالوسط ساعد كتير وغيرو ...وبالجيل القديم طبعا" عمر كنفاني بالرغم من أنو بدأ اللعب كظهير بس بعدين انطلق بالهجوم كمان متل ماقلت بمساعدة ودعم خط الوسط الفعال جدا" وقتها ساهم كتير بلقب الهداف ما بننسى عبد الناصر حجازية كان لاعب كبير وكنت أتطمن لما شوفو ورايي بخط الوسط كان يمسك الملعب كلو ...وغيرو من الأسماء ما عاد بذكر , لذلك بقول انو حاليا" خط الوسط شوي مقصر بدعم الهدافين وبمهامو بالنص

[Saeedoo]

أسئلة الأعضاء :

أبو عدنان الحطيني :

مع التغيرات الجديدة بنادي حطين و في حالة توقيع عقد الراعية و انشاء الله الاستقرار في النادي واعداد خطة منظمة و دقيقة
للكرة في حطين ابتدأ من القواعد الى الفريق الاول
هل يفكر في العودة في ظل هيك أجواء لو بعد سنتين مثلا؟؟

تمت الإجابة ضمن الكلام عن حطين

ووصل سلامك إلو ..وبسلم عليك وعالوالد...د. أبو الياس


al_dahaby

صحيح انه قدم خطة لتطوير القواعد مستمدة من مدرسة مانشستر للقواعد ولكن لم يوافق عليها من قبل نادي حطين لانها لا تتناسب مع الخطط التي كانت موضوعة وقتها

و من هو اللاعب الشاب اللذي لم ياخذ حقه و فرصته في نادي حطين
بخصوص الخطة ما كان في تقديم لخطة بهالشكل ...لأ
ممكن صار نقاشات واستشارات أحيانا" ...بس ما تم تقديم خطة بشكل رسمي أبدا"

واللاعب اللي ما أخد فرصتو بعتقد (رامي جمل) للأسف بسبب إصابتو اللي أبعدتو عن الملاعب

و هل هناك نية مستقبلية بالعودة الى نادي حين و شغل منصب
تم الإجابة

الحوت المهاجر

سؤالي :: في عنده اي فكرة لعمل اتفاقية تؤامة مع نادي الوحدة الاماراتي واقامة معسكرت ودورات تدريبة مشتركة ؟؟

س 2 : برشح اي لاعب حاليا من حطين من خلال متابعته للمباريات انه يحترف بالوحدة الاماراتي بحكم كونه عضو بلجنة انتقاء المحترفين ؟؟

أنا متل ما ذكرت وبذكر جاهز لأي مساعدة من هالنوع بس

هاد الشي لازم ينطلق من إدارة النادي ...أنا مابقدر أتحرك بدون مايكون في ضوء أخضر وترتيب أمور مناسبة من الإدارة ومن النادي ...وعلى فكرة مدرب نادي الوحدة السوري (عماد شومان) حكا معي وطلب شيء مشابه ووعدو بالمساعدة وأنو نشتغل عالموضوع

بس كمان لتقدر تجيب نادي حطين وتعمل علاقات من هالنوع لازم الناس تنجذب لأسم النادي ..للأسف نحنا ماعندنا أبدا" قسم أو شي أسمو علاقات عامة بنادي حطين ..يمكن حتى عالصعيد الإعلامي المنتدى والموقع هاد منكم وليس من النادي ...يعني مثلا" نادي الكرامة لما بيجي لهون بجيبو معهم دروع تذكارية وبتنظيم مميز وإمكانيات جيدة ..وللأسف عنا بالنادي ماعنا شي من هالنوع
بس بكل الأحوال أي شي بينطلب مني بالنادي أنا مستعد لتقديم العون اللي بقدر عليه.

أما بخصوص السؤال التاني بصراحة حاليا" لأ ..ما بقدر رشح لاعب من حطين يتناسب مع هالشي

ahmad_hutteen

1- </كيف ترى فريق حطين وهل هو يسير على الخط الصحيح؟
أكيد لأ ..ما عميسير عالطريق الصح ...وبصراحة موضوع الطريق الصح بيختلف من شخص لأخر ..بالنسبة إلك ولأبو ناظم مثلا" يمكن الطريق الصح أنو ناخد الدوري ..بالنسبة إلي الطريق الصح مختلف لأنو أنا بدي يرجع النادي ونبني النادي بالأول , شو الفائدة ناخد بطولة الدوري أو كأس العالم وبعد شهر نخسر مباراة ..!!؟؟ رح يرجع يشتمنا الجمهور ورح نرجع عنقطة الصفر ..وهيدي هية النقطة هية الإستمرارية..
( أبو ناظم ) خوالي وأقربائي اللي أخدوني عالملعب أنا وصغير بيقولو أنو بدنا نشوف حطين أخد الدوري قبل ما نموت ؟ لذلك صرنا نقول نفس الشي هلق ؟
الله يعطيهم طولة العمر لكن ...

2- سمعت كثيرا من رئيس النادي ومن اعضاء النادي انه بس يخلص عقدك مع الوحدة الاماراتي ستأتي لحطين ( اي بعد اشهر ) وتستقر بناديك حطين هل هذا صحيح؟
لكون صريح في فكرة وحكينا بالموضوع متل ما قلتلك ...بس أنا متل ما حكيت إذا اشتغلت بنادي حطين بالفكرة اللي قلت عنها لازم يكون عندي مدخول تاني لأمن حياتي منو ..أما إذا اشتغلت بتدريب كرة القدم للرجال بس فهاد موضوع وظرف تاني وبيترتب عليه شروط تانية .
3- هل صحيح انه انت لك الفضل بقدوم الشركة الراعية لنادي حطين ( مجدالخليج )؟
لأ ..أبدا", بس سمعت فيها عن طريق سليم سبع الليل..وهية خطوة صحيحة إذا ماشية بالإتجاه الصح ...وطبعا" كتير ضرورية معرفة تفاصيل عقد الرعاية ..بتمنى تنجح وبتمنى ما يبدأو بعض الناس بنشر الإشاعات ووضع العصي بالعجلات لأنو للأسف نحنا في هالشغلة كتير عمتضرنا أنو ما منحب بعض .
4-هل تقراء وتتابع منتديات نادي حطين وكورة ؟
والله بشكل قليل كتير ...أنا عندي كل يوم 45 دقيقة لساعة بدخل فيها عالانترنت بشوف إيميلاتي وبتابع بعض الأخبار ..فحسب وقتي أحيانا" قليلة بدخل
5- برايك ماهو علاج منتخبنا وكيف نستطيع النهوض به وتحقيق نتائج ملتفة ؟
علاج منتخبنا بينطلق من علاج رياضتنا وأنديتنا بشكل عام (ذكر ببداية المقابلة - الخصخصة وإعطاء الحرية الإدارية للنوادي والصلاحية بالقرارات و..إلخ)

ابو الليل

السؤال : كيف ترى مستقبل الكرة الحطينية مع الأخذ بيعين الأعتبار إن أتى أو لم يأتي
واحلى أبو اللياس

حاليا" الوضع غير مطمئن بشكل عام مع العلم أنو في أفكار حلوة من رئيس النادي بس ما في تعاون وما في خطة واضحة طويلة الأمد ( تم الشرح بالتفصيل بالردود السابقة)

mido31

مشكور اخوي انا سلملي عليه وقلو ايمت مفكر ترجع على حطين كابتن

تمت الإجابة ..

ليفربول22

دكتور عمار كيف ترى عمل الادارة بالوقت الراهن وهل السيد سليم سبع قدم اضافات وتطورات جديدة على النادي؟
وهل انت مستعد للعمل بالنادي بعد انتهاء عقدك ؟
بمن ترى نفسك باللاعبين الشباب الموجودين حاليا مع فريق حطين لرجال ؟

كمان تمت الإجابة عن الأسئلة

والسؤال التالت .. بتعبير أخر ...لأنو كل لاعب إلو مواصفاتو الخاصة وما بعتقد لاعب بكون مكان لاعب بس لفت نظري سليم خضرة كما ذكرت سابقا"

ALEX IL RE

كيف تتم معاملة الإدارة ( إدراة الوحدة طبعاً) لمدرب قدير مثلك لقواعد ناديها ...؟ ممتازة جدأ وبصراحة هية أهم الأسباب اللي دفعتني للبقاء وخصوصا" متابعة الشيخ سعيد + الكابتن عبد الرحمن جمال مدير الأكادمية اللي بوجهلو تحية

سؤال آخر ... هل هناك لجان مختصة للبحث عن الناشئين الصغار أو الموهوبين ؟

بالطبع في لجان متخصصة منسميهم الكشافة بيبحثو عن المواهب بالإضافة للي بينضمو بشكل فردي لعندنا ( تم الإجابة مفصلة مسبقا")

هل هنالك أمل بالعودة لناديك الأم حطين ؟

هل صحيح أن النادي ... طلب منك العودة .. ولم تعد ..؟

كمان تمت الإجابة بالتفصيل بسياق الموضوع بالأول

الحوت الازرقhutteen

اللاعب الخلوق الاكثر اخلاصا وحبا لناديه حطين الدكتور عمار عوض من تجد خليفتك من لاعبي حطين الحاليين

ما بقدر قول خليفة أو شي ...كل لاعب إلو أسلوبو وتواجدو ...يمكن أقرب واحد لتفكيري يمكن هو اللاعب سليم خضرة هاللاعب موهوب ومميز بس بحاجة لشخصية بالملعب وثقة بتواجدو بالملعب ليقدر يبرز ويتميز

(أبو ناظم )_ دكتور بس بظن أنو نحنا افتقدنا القائد بالملعب أنت كان يميزك أنك كنت قائد بنص الملعب و كانت كلمتك مسموعة من اللاعببن وحتى الجمهور يعني لما الجمهور يعصب وأنت تحاكيهم كانت العالم تسكت وتسمع كلمتك
فعلا" يمكن هالشي ما عاد شفناه بالفريق

دكتور أبو الياس صحيح أنك ما أخدت ولا إنذار أصفر خلال مسيرتك ؟

بالرجال فعلا" ما أخدت ولا إنذار ...بس مرة بالناشئين أخدت أحمر يومها بالحسكة كانت مباراتنا ...وبطريق الخطأ حصلت عالإنذار بدل لاعب أخر ...بس بالرجال ما أخدت ولا إنذار ولو حتى أصفر

نيدفيد الحطيني

أول شي سلم عليه .. وبعدين اسألي ياه بيتذكرني يا ترا .. كتير اوقات واكتر من مرة يعني بعد العبة لما يطلع من المشالح ... كان يطلع ويحطني على كتافو ويمشي فيني .. واذا نسيان اعمل اللازم انت.

ما بيصير ينساني لأنو.

بتذكر أنو عملت هالشي كاممرة بس والله ما ذاكر الشخص مظبوط ويمكن كنت كتير صغير وقتها وتحياتي إلك

وقلوا اني بطالبوا غصب عنو انو يرجع والا بزعل منو

إن شاء الله منقول خير

اسئلة تانية
- شو الاخطاء اللي عم تصير بحطين .. يعني شو سبب التخبط بالنادي .. وين نقاط الضعف برأيو.

وشلون ممكن تنحل.. مايقلي ما في أخطاء وما في نقاط ضعف بدنا صراحة

تمت الإجابة

تم شرح المشاكل بالتفصيل يا حمودة .. راجع بداية اللقاء

- هل سبب وجودو بالامارات الى الأن هو المال او الحالة المادية؟

سبب تواجدي بالإمارات هو بالإضافة للظروف اللي وصلتني لهون ..هو الصراحة التقدير الكبير اللي بتوليه إلي إدارة نادي الوحدة والمسؤولين بالنادي .. سواء عالتقدير المعنوي أو حتى التقدير المادي ... وبخص بالذكر الشيخ سعيد والكابتن (عبد الرحمن جمّال)

بعبارة أخرى شعرت بقيمتي هنا كشخص دارس ومتعلم لكرة القدم ورياضة بشكل إحترافي ...وبقول أنو نادي الوحدة له الفضل علي بكتير أمور بغض النظر عن الأمور المادية ولكن أنا تعلمت كتير أمور كمان بنادي الوحدة واستفدت من خبرات ناس وتعاملت مع مدربين كبار ...يعني أخدت وعطيت طبعا" ..لذلك ما بنكر الفضل للنادي وإدارييه

طبعا" صار بالإضافة لعلاقاتي الرياضية القديمة من خلال سفري لكتير دول ..صار عندي شبكة علاقات ومعارف أكبر من خلال هالعمل والحمد لله شغلي ولغاتي الأجنبية ساعدوني على تطوير هاد الشي بشكل إيجابي

- ايمت كانت اخر مرة بيزور فيها مقر نادي حطين .. وشو اخر لعبة تابعها لحطين على التلفزيون او بالملعب..؟

متل ماذكرت قبل أنا بكل إجازة بسورية لازم زور النادي بالتأكيد ...والسنة الماضية أخر مباراة حضرتها بالملعب أما عالتلفزيون فهي مباراة حطين والجيش الأخيرة

- شو رأيو بالفريق الحالي بصراحة .. مين لفت نظرو من اللاعبين ..؟

لفت نظري بصراحة سليم خضرة لاعب مميز وعندو موهبو كبيرة ...هادي ورايئ ..بصراحة ما بعرفو بشكل قريب بس حسيت أنو أكيد عندو إمكانيات وكتير موهوب بس الشغلة الوحيدة اللي أخدتها عليه أني شعرت كأنو بحاجة لتقوية شخصيتو بالملعب وثقتو بنفسو لينطلق بشكل أفضل

- اذا طلبت ادارة نادي حطين منو انو يحاول يدبر لحطين لعبة مع النادي اللي هوموجود فيه هل يقبل ويحاول او لا ..؟

هاد الموضوع سهل جدا" وأي شي بيطلبو مني إدارة النادي أنا جاهز للتلبية

طيب ليش ما بصير معسكر مثلا" للفريق بالإمارات هون

تمت الإجابة مسبقا"

- اينو اهم بالنسبة لاندية كرة القدم .. هل هو العمل وفق نظام اداري وخطة منظمة ويكون النادي اقرب لمنظمة عمل .. او ادارة تكون معها المال وتضخ المال بالنادي بيغض النظر عن النظام الاداري او التنظيمي

علماً انو صعب اجتماع التنين سوا

بكل تأكيد النظام الإداري والتنظيمي هو الأهم يعني لو كل يوم كنت عمتدفع مصاري وهالمصاري عمتروح وبعدين !؟ ماحدا فينو يضخ مصاري بشكل مستمر مهما كان معو فلوس , لازم تعرف كيف أنك ترجع المصاري مو بس تحط المصاري لازم يكون في نظام معين ما بس بكرة القدم بكل الأمور العملية لازم تشتغل وفق خطة معينة

نظام إداري وهيكلية إدارية مدروسة ... متل أي مؤسسة تانية لأنو النادي هو عبارة عن مؤسسة لازم يكون فيه قسم علاقات عامة قسم شؤون موظفين قسم التسويق والإعلام السكرتارية وغيرها ..أقسام أخرى متل أي مؤسسة وبيجي بالأخر قسم المدربين والألعاب ...أنا دارس ومتعمق كتير بهالأمور ...إذا بتحبو بطلعكم على بعضهم شي كتير مدروس ومتشعب وللأسف نحنا ما عندنا شي من هالمذكور

- شو هي اول الامور اللي بيعلمها للولاد الصغار .. وشو اكتر شي اواهم شي لازم يتوفر بلاعب

وشو الشي اللي بيلفت نظرو باللاعب من الناحية التقنية

أول شي أنا بعلم اللاعبين عندي أنو يحبو اللعبة ..يحبو كرة القدم تماما"...عمبحكي كشخصية عامة لأنو بس حبيت الشغلة بتقدر تنجح فيها وتبدع وبتنتج

أما بخصوص الإختبارات ..عنا إختبارات معينة وخاصة للاعبين الناشئين
أول شغلة ببحث عنها باللاعب (يمكن تستغربو) هي السرعة لأنو السرعة هية العامل الوحيد اللي مافي مدرب قادر يطورو يعني حتى لو سعيت وحاولت بالتدريبات لتحسين سرعة اللاعب النتيجة رح تكون أقل بكتير من المطلوب خاصة أنو ملعب كرة القدم هو صغير نسبيا" وبحاجة لسرعة كبيرة من اللاعبين
وبالإختبار في عنا عدة أمور منشوفها منسميها ( Tips)

هية بالترتيب : TECHNICAL الناحية التقنية (الفنية)

I = INSIGHT الرؤية العامة للاعب بالملعب

P = PERSONALITY شخصية اللاعب بالملعب

S = SPEED اللي هية السرعة

من خلال توفر هيدي العوامل الأربعة والأهم فيها متل ما قلت السرعة لأنو العوامل التانية ممكن تطويرها قياسا" على عامل السرعة ...وبتوافر موضوع حب اللعبة طبعا" عند اللاعب ..بتم الحكم على نجاح اللاعب .

كام سنة لسا بدو لحتى ياخد دوري بصراحة .. وهل سنة شو بيتوقعلو مركز

بتوقع ترتيب سادس وسابع .. وبالنسبة للدوري متل ماذكرت مسبقا" أنا رأيي وطريقتي مختلفة ..يعني ممكن ياخد الدوري السنة الجاية أو اللي بعدها بس بدون أي استمرارية ..وممكن ماياخدو بحياتو على هالحالة

الموضوع بحاجة لوضع خطة محددة من إدارة النادي مع العلم أني بحترم كتير طريقة تفكير السيد سليم سبع الليل اللي عميحاول يشتغل صح بحيث أنو ما عميفكر بطريقة لحظية بل عميفكر بالمستقبل .

- هل كان هناك اتصال بينو وبين الادارة الحالية بقيادة سليم سبع الليل .. وشو رأيو بالإدارة ؟

في اتصالات كتيرة بيني وبين سليم والإدارة الحالية ومناقشات بتصير دوما"

الشباب عميشتغلو ويحاولو يعملو شي بس مهم كتير أنو الناس توقف معهم وتدعمهم ..ما بقصد الدعم المادي بقصد دعم معنوي ومساندة ولو بالكلام أو يكونو هم أصحاب القرار ويشتغلوا يطنشو عن كلشي

بحب قول أنو الديكتاتورية مهمة أحيانا بهيك مواقف ورئيس النادي لازم يكون ديكتاتوري شوي
طبعا" ياخد أراء الكل ويسمع الكل بس ما يسمح لحدا يتدخل بقراراتو أو يشاركو بإدارتو ..طبعا بالإتفاق مع مجلس إدارة النادي اللي لازم يكون إيد وحدة

اسئلة سريعة

- شو بيعنيلك حطين ..؟ ( طبعا بعد ما يجاوبك سعيد والاجابة حتكون كتير ايجابية .. اسألو ما دام كل هل قد النادي هلق عم يطلبك ليش ما بترجعلو

كمان تمت الإجابة ببداية الحديث عن هالسؤال

- شو هي اجمل ذكرى الك مع حطين ؟؟ واسوأ ذكرى ؟

أسوأ ذكرى هية مباراة نهائي كأس الجمهورية مع الوحدة بالشام

بالنسبة لأجمل ذكرى يعني في عدة أمور بس يمكن من الذكريات اللي ما بنساها يوم كنا عمنلعب بالحسكة مع الجزيرة كان لسا عمري 18 سنة ولازم نفوز بهالمباراة لنطلع عالدرجة الأولى وكانت حلوة بالنسبة إلي لأنو أول مرة ألعب بالدرجة الأولى و لسا شباب

أجمل هدف :
هدفي التاني عالإتحاد بحلب بمباراة فزنا فيها 3-1
كمان في كول عالحرية بالرأس

- النادي العالمي المفضل الو

مانشستر يونايتد ..ومعجب بمسيرة السير أليكس فيرغسون

- اللاعب المفضل
أنا أعشق اللاعب رونالدو خصوصا هلق متذكرو من كام يوم اللعبة اللي سجل فيها هدفين ...وكاكا بالطبع الاعب الرائع
- المدرب المفضل؟

ريكارد – أنشيلوتي ...وعندي طموح أني أخطي أو أعمل مسيرة السير أليكس فيرغسون ..متل ما ذكرت بتمنى أنو نقدر نعمل شيء مشابه بحطين
يعني لما استلم السير أليكس فيرغسون المان يونايتد من شي 26 سنة انتظر 7 سنين بدون أي بطولة دوري أو شيء مهم يذكر بس بعد هيك عمل إنجازات خارقة وتاريخية (18 لقب)
أنا متطلع بشكل كبير عتجربة مانشستر يونايتد وكنت مع بعض الكشافين عندهم وبعرف كيف بدأ النظام وعمل الأكادمية وعمل عشر ملاعب بنفس القياس وبدأ تطوير اللاعبين والبحث عن المواهب

- الخطة المفضلة
الخطة بالطبع بتكون حسب إمكانات اللاعبين الموجودين ...ما بتقدر تفرض خطة عاللاعبين بدون ما تدرس تناسبها معهم

بس بالمراحل السسنية يعني 14 -15 سنة بحب ألعب بخطة 4-3-3
على خط واحد لأنو هالخطة بتعلم كلشي وممكن بعدين بالرجال تقدر تقولبها وتطورها لأي خطة تانية على حسب المدرب
شو رأيو باليوفنتوس + شو رأيو بنيدفيد :
نيدفيد من اللاعبين الكبار والموهوبين فعلا طبعا" ما بحاجة لشهادتي ويمكن لو كان بفريق غير التشيك كان من أهم لاعبي العالم ...
والجوفنتس نادي منظم وعندو هيئة معينة ومحددة محافظ عليها دوما وحتى ستايل اللعب المعروف فيه دوما يمكن أحيانا غير ممتع بس عميحقق نتائج كتير مهمة

- بظن هو متزوج فشو عندو ولاد .. وهل بيفكر انو يعلمهم على كرة القدم ويخليهملاعبين محترفين ويجيبهم على حطين ؟

أنا متزوج من (هيا عبود) لاعبة كرة السلة سابقة وعندي بنت وحيدة

طيب إذا عندك أولاد رح تخليهم يدخلو مجال الرياضة ؟
أنا متل ما قلتلك ما عندي غير هالبنوتة ومع أني دربت كتير بنات بمدارس كروبة برا وحتى عندي هون فريق بنات عشر سنوات بالإمارات بس بنتي يمكن كرهت الرياضة بسببي يعني ما بتشوفني غير يا عمبحضر مباراة أو عمبشتغل عالكمبيوتر أو عمدرب ..فبعتقد أنها مارح تحب تدخل هالمجال أبدا وأنا مارح أضغط عليها أكيد مع أني بتمنى أنها تدخل هالمجال.

اليزن الكرماوي

د.ابو الياس
كيفك

طمنا عنك

وليش عم يصير هيك بالوحدة الاماراتي وخصوصاً بعد عودة ابو بدر

أهلا وسهلا أبو يزن ... السبب هو أننا عملنا إحلال للفريق الجديد الشاب بسرعة كبيرة وبشكل مفاجئ ...وتبع هالشي إصابة عبد الرحيم + حيدر وانطرد بشير سعيد 3 مباريات .. بالإضافة لأنو أحمد جمعة انتقل للجزيرة وفهد مسعود اعطيناه لنادي قطر وكان عنا مشكلة بالأجانب ..كل هالعوامل أدت لانخفاض المستوى بشكل كبير ...بس بتوقع أكيد بالإياب مع عودة اللاعبين المصابين ووجود الأجانب وانسجام الفريق الجيد جدا اللي طلع من هون من الأكادمية عنا رح يكون الفريق بطل الإياب ..و بخبركم أنو هالسنة رح ينافس عالأسيوية ومارح يكون سهل والسنوات الخمس القادمة رح يكون منافس قوي عالدوري

Made of Gold

سؤال :
ايمت آخر مرة حفرت سن و ركبت تاج ..؟

أخر مرة يمكن بالـ 91 مارست دراستي بطب الأسنان ..أنا صحيح ابتعدت عن اختصاص الطب ..بس كمان عملت دراسات عليا بالإدارة الرياضية والتسويق وكتير تعمقت بالدراسات الرياضية والتدريب ...وحتى تقدر تدرب بجامعات كندا وأميركا لازم يكون معك دراسات عليا وشهادة جامعية ..يعني ما بس أنو تكون عامل دورات تدريب وبيمشي الحال ! لأ لازم يكون عندك شهادة جامعية لذلك أنا استفدت من دراستي إلى جانب طب الأسنان دورات التدريب ودراسات الإدارة الرياضية
عرباوي مر
متى حنشوفك في سورية ابو الياس سلامي اللك

أنا عقدي بينتهي بالشهر السادس ومتل ماحكيت في فكرة للعودة بس في شوي ةأمور وضوابط بحاجة للدراسة ولنشوف شو الله بريد

فراس الأهلاوي
وين العلة تحديدا بكرة حطين؟؟
تم شرح الإجابة مطولا" ببداية المقابلة
أبو شيركو العفريني
ما هي أفكارك يا كابتن عمار لرفع مستوى الأندية السورية احترافيا... وهل تقبل تدريب نادي عفرين اذا عرض عليك

كأفكار لرفع مستوى النوادي برأيي بالأول لازم تدخل الخصخصة عالنوادي بشكل أكيد ومدروس ..بعيدن بحاجة لإدارة محترفة قبل لاعبين محترفين ...يعني لتنجح بأي عمل برأيي بالأول بحاجة لإدارة منظمة وعلى قدر من المعرفة والنشاط والجدية بالعمل وطبعا" الإمكانات المادية والدعم وهيدا الشي بساعد فيه الخصخصة ...وكل نادي يكون صاحب قرار نفسو ليقدر يشتغل ويطور نفسو.
وبالنسبة لنادي عفرين إذا رجعت لسورية مع احترامي لكل الأندية ماعندي أي مشكلة مع أي نادي بس بحاجة لدراسة الشروط والإمكانيات مع مجلس الإدارة لأنو أنا عندي طموح ونظرة وبدي شوف إذا بقدر شوفها من خلال هالنادي مو أمور مادية فقط بحد ذاتها بس في كتير أمور أهم كمان , باستثناء نادي حطين اللي ماعندي أي شروط مسبقة معو ...

[Saeedoo]

بعض الصور من اللقاء :









بالنهاية بتشكركم عالقراءة

وبعتذر على الإطالة وبعض الأخطاء الإملائية
وإذا نسيت بعض الأسئلة بطريق الخطأ ...لأنو عانيت كتير بتجميع وكتابة المقابلة

[علي الحطيني]

مشكور اخي سعيد ع هل المقابلة الحلوة والشيقة مع الكابتن عمار فعلا لقاء شيق وممتع ان شاء بيرجع ع النادي وبقدم خبرته من اجل تعزيز مكانة حطين ونحن الان بجاجة الى كفاءات وخبرات رياضية من اجل الاعتماد ع الاسلوب الحديث بكرة القدم

[الامير totti]

ليتني استطيع التعليق على جملة واحدة لم اعجب بها

كلام اكثر من رائع من انسان غاية في الروعة ...

انا بقلك كلمتين

اشتقنالك ابو الياس عنجد اشتقنالك

[Kh@led]

مشكوررين شباب على المقابلة الحلوة ..
ولطالما , قلت من قبل ,, بستغرب كيف ممكن اي شي ياثر على نادي رياضي , كنادي حطين او بقية الاندية السورية .

وقدسية النادي من اهم الاشياء يلي بيفتقدا النادي .. وانا كتبت بردي على مقابلة رئيس النادي , انو ما معقول نعمل اجتماع , ويكون في عالم ما الها علاقة لا بادارة الموقع , وبلا بادارة النادي .

انا بصراحة حلمي شوف الدكتور عمار بنادي حطين , و الدكتور هو اول لاعب بحفظ اسمو من مبين لعيبة حطين اول ما بلشت روح احضر مباريات حطين .

[al3keed]

واللهي لقاءءءءءءءءءءءءءءءء كتير حلو وكلام واعي من شخص فهمان كتير والله يعطيكون العافية والله يرجع أبو لياس لحطين

[سامر خالد منى]

أبو إلياس من يومه يومه كبير

شكراً عاللقاء

[wala fil a7lam]

أبو وليد مشكور على المقابلة
ماقدرت شيل عيني عنها حتى خلصت
أبو الياس قمة الرقي والمنطق والعقلانية.. هيدا هو أبو الياس وبعمره مارح يتغير
اللي لفت انتباهي أنو أول مرة بشوف حدا بيعطي خالد حكيم و عبد الناصر حجازية حقهم.. لأن هل اللاعبين قدموا الكتير لحطين
كلام أبو الياس عن فجر منطقي جداً... وبتمنى الجميع يقرأ التفاصيل وليس العناوين
الامر الاخير... باعتقادي بدنا كتير بحطين حتى نشتغل بهيك عقلية احترافية
الأمور أصعب من انو يجي أبو الياس وبيمشي الحال... بدنا أول نخلص من علل هل النادي ونبني أرضية سليمة للعمل.. وهيدا بدو نفس طويل ودعم كبير
والله يكون معك ياأحلى أبو الياس

[حسن مكيس]

الله يعطيك ألف عافية أبو وليد الغالي والله لا يضيعلك تعب.
أما بالنسبة لأبو الياس أكيد لاعب مميز وانسان خلوق وما حدا بيقدر يشكك بحبو واخلاصو لحطين ومن أبناء الجيل الجميل والذهبي.
أهم نقطة لفتت نظري في الحوار هو التواصل الشبه يومي بين أبو الياس وبين أبو صطيف للوقوف على آخر الأخبار وبينه وبين أبو ديب للتشاور والنقطة الأحلى برأيي أنه لا يرفض العودة لنادي حطين وتمثلت أغلب متطلباته بما يضمن سير عمله بشكل جيد أي أنه لا شروط شخصية أو خاصة وهذا دليل على ان حب حطين كان ولا زال يملئ قلب هذا الانسان الرائع.
بالتوفيق لابو الياس أينما ذهب وإن كان طمعنا وحرصنا على حطين يحتم علينا أن نتمنى أن تكون المحطة القادمة والأخيرة هي حطين.

[أحمد وزان]

د.عمار عوض
حطيني أصيل
و يكفينا فخراً أنه مازال متمسك بروابطه الحطينية
دمت لنا و دام حطين للجميع

مشكور سعيد على هالمقابلة الحلوة اللي كانت على قلب كل مشجع حطيني قراها

سلمات