جمهور حطين والمشاكل

[sami for hutteen]

اخوتي الحطينية السلام عليكم و رحمة الله و بركاته :

امبارح و انا وسهران بأحد المقاهي على البحر في جدة بالسعودية مع اثنين من أصدقائي الحطينية طبعا اسمعت أحد الحاضرين بالقهوة عم يقول ................ على حطين ويلي بحب حطين درت وشي عليه وقلتلو يا معلم زين كلامك طبعا لتجنب المشاكل لأنو طلع الشب سوري وما حلوة نعمل معو مشاكل بعدين شو بدهن يقولو عنا ؟ المهم وبلا طول سيرة الشب ما فهم ورجع عاد كلامو الحقيقة انا ما اقدرت امسك حالي ورديت عليه بمتل ما قال بس ما هون المشكلة......................... المشكلة أنو طلع على الطاولة التانية كمان شب من الشباب الطيبة الحطينية الله يقوي ويحمي قام وبكل ثقة مسك الشب يلي عم يحكي على حطين وقلو لو سمحت كلمة برة القهوة وهون بديت الحكاية الله وكيلكن ما حسيت حالي إلا اني باللادئية وصارت مشكلة ما بالعقل وبلشت تكبر وصارو حوالي 7 ضد 5 طبعا 5 حطينية و أنا واحد منن حاولت أنو هدي اول الشي بس كل ما اسمعهن عم يبو حطين و كل واحد حطيني يطير عقلي و المهم بقينا هيك على هالحكاية حوالي ربع ساعة واتكسرت القهوة وانضربو ناس ما الهن علاقة وشو بدي احكي لاحكي .
المهم بدي قول بالأخير انو نحن الحطينية و الحمد لله ما منقبل نحطها واطية لحدا وما امنقبل حدا يجيب سيرة فريقنا الغالي وجمهورو الأغلى ولو بكلمة وكلو فدا حطين بهون

[sami for hutteen]

نحن الحطينية وبس

[مهند شاويش]

لا حول ولا قوة الا بالله بس نشالله يكون هداك الندل أكل أتلة مرتبة
سلامتكن اخوي والحطينينة قبضايات من يوم يومن بس ما منريد تنعطى عننا صورة سيئة بس المسيء بيستاهل يتربى

[sami for hutteen]

الله يسلم أخوي ديل بييرو ما اتخاف أكل حسابو وزيادة

[حطيني وبس]

عراااااااااااااسي الحطينية والله رجااااااااااااال وما بيحطوها واطية
حطيني وبس

[Fadi]

ياجماعة والله مابيصير هيك ماكان المفروض انّو تنزلوا لمستواه (فإذا خاطبهم الجاهلون قالوا سلاما) يعني ماضل عنّا وجه حلو متل العالم والخلق سمعتنا صارت برّا سوريا وخاصّة بدول الخليج ماكويسة فرجاءاّ اخواني المحافظة على ضبط النفس والأعصاب وإعطاء الصورة الأنيقة والجميلة للشاب السوري التي كانت في الماضي .

[usamafares]

الأخ فادي حكيت الصحيح...الكل بيحب نادي حطين و ما حدا بيتمنى يحكي عليه...بس كمان ما معقول نزل لمستوى التافه يللي شتم النادي...حتى عنوان الموضوع (جمهور حطين و المشاكل)؟؟؟ يعني مبين و كأنو نحنا منحب المشاكل...الشغلة صارت و الزلمة أكل حسابو...بس يللي بيقرا الموضوع و مانو حطيني شو رح يقول: جمهور حطين ما بيرضى يسمع حدا عم يحكي ع النادي و برابو عليهون, و لا رح يقول جمهور حطين مشكلجي؟؟؟

[FIRAS]

لك حبابي والله عيب
وانا أول واحد مستفيد بدرس من هالموضوع

يعني مرة هون بمصر اضطريت اكبس واحد وحداوي لانو كبرلي دماغو بس والله ندمت بعدين
بدها طولة بال
بس ليك خيي اذا كان هاد السافل اللي عم يثرثر أهلاوي حلال عليك هههههههه
سبحان الله ما بحبون

[قلب حطين النابض]

الله يحي شواربك اخوي سامي ولو ما الك شوارب برافو عربكم بس ما قلتنا من وين هادون لاي نادي بينتمو

[GUEVARA]

الله حيو
لك وربي الحطينية ئبضايات وين ما يكوني
ما قصرتو اخوي

[سامر خالد منى]

جميلٌ جداً أن نحب نادينا هذا الحب الشديد الجارف
الحب الذي يجعلنا نرى له حرمةً كحرمة أعراضنا
وهو حبٌّ محمودٌ وصحيٌّ ما لم يتحولْ إلى عصبيةٍ قبليةٍ
عمياء!!
معك حق في الغيرة الشديدة على حطين ومن يحبه
ومحاولتك إسكاته ولا سيما أنَّه لم يقدِّرْ قيمة حديثك الودي ،
ولكن تطور الأمر إلى المشابكات بالأيدي فهذا يعطي الآخرين
فكرة سيئة عن حطين وجماهيره ، ولا أقصد بالآخرين الذين
اشتبكتم معهم ، بل الموجودون حولكم !!


من وجهة نظري يجب التحلي بخلقٍ كريمٍ وهو ضبط النفس
فمما قالهالشاعر الجاهلي عمرو بن شمر الحنفي :
ولقد أمرُّ على اللئيم يسبني ++++ فمضيْتُ ثمَّت قلْتُ لا يعنيني

ولا تنسَ قول الإمام الشافعي رحمه الله :
إذا نطقَ السفيهُ فلا تجبْهُ +++ فخيرٌ من إجابته السكوتُ
فلو جاوبْته نفَّـــــسْتَ عنه +++ ولو خلَّيتهٌ كمداً يمــــــــوتُ

ولا نفعل ما قاله عمرو بن كلثوم :
ألا لا يجهلنْ أحدٌ علينا +++ فنجهلَ فوق جهلِ الجاهلينا
بل :
ألا إنْ يجهلنْ أحدٌ علينا +++ فنحْلُمَ فوق جهلِ الجاهلينا

[فراسوو]

الله يقويكون ما قصرتو

[sami for hutteen]

معلم سامر والله انا ما كان بدي أعمل مشكلة حتى انو لاخر وقت و أنا عم حاول خلص بس هنن حسييتون ااصدين المشاكل ومتل ما قلتلكن أنا أول الشي حاكيتو حكي ما بس لأتو سوري (تشريني )بس مشان ما ياخدو فكرة غلط عن الشاب السوري المعروف بشهامتو وشخصيتو الحلوة وين ما كان الحمد لله والحمد لله الشب السوري محبوب وين ما راح المهم الحمد لله مضيت عل خير

[sami for hutteen]

أخوي شيكافارا الله يحميك الحمد لله نحن قد حالنا وما كان ولا بكون مين بدو يجيب سيرة السوريين بشكل عام أو الحطينيين بشكل خاص بأي كلمة

[sami for hutteen]

أخوي قلب حطين النابض الله بيعلم اني حبيتك وتحية لشواربك يا غالي

[sami for hutteen]

أخوي فراس والله بعرف أنو ما حلوة وعيب يلي صار بس شغلة ومضيت والحمد لله مضيت على خير

[sami for hutteen]

أخوي حطيني وبس كلك ذوق يا غالي تحية قلبية حارة الك

[sami for hutteen]

يا جماعة بحب خبركن أنو والحمد لله القصة مضيت على خير واتصالحنا مع الشباب وما خلينا حدا يشمت فينا ويقول انو شوفو السوريين كيف بيعملو مشاكل وصرنا عم نقعد مع بعض بالقهوة وكل شي تمام ( اترضى علينا حج سامر ) وادعيلنا .

[سامر خالد منى]

أرسل أصلا بواسطة sami for hutteen

معلم سامر والله انا ما كان بدي أعمل مشكلة حتى انو لاخر وقت و أنا عم حاول خلص بس هنن حسييتون ااصدين المشاكل ومتل ما قلتلكن أنا أول الشي حاكيتو حكي ما بس لأتو سوري (تشريني )بس مشان ما ياخدو فكرة غلط عن الشاب السوري المعروف بشهامتو وشخصيتو الحلوة وين ما كان الحمد لله والحمد لله الشب السوري محبوب وين ما راح المهم الحمد لله مضيت عل خير

الحمد لله مضيت على خير
والله يبعد المشاكل عن الحطينية الشجعان

[Rossii46]

يا شباب ما كل شخص استعمل ايدو صار رجعي والله احياننا في ناس ما بتفهم بغير هيدي اللغة
بدي اسئل سؤال فينك تحكي مع الاجنبي عربي
لهيك تحيا الايادي الحطينية