كيف الشباب ....
كترت بالفترة الأخيرة الأحاديث عن مباراة تشرين و أهميتها
و اختلفت الآراء ما بين مين إعتبرا لعبة متل أي لعبة بالدوري و بالنهاية هي 3 نقط و بين مين اعتبرا أهم لعبة بالدوري والبعض أتطرف و أعتبرا أهم من بطولة الدوري...
و أنا من جهتي بدي أعطي رأيي مع شوية مقترحات:
أنا من العالم اللي بتعتبر هاللعبة من أهم مباريات الدوري و الفوز فيها إلو نكهة خاصة و طعم تاني و ما حدا يكابر و يعتبر هاللعبة متل أي لعبة بالدوري
فالفوز على تشرين بيفتح الطريق لأنتصارات متتالية و بيحل كتير من مشاكل النادي
على عكس الخسارة اللي غالباً ما بتأدي عند الناديين لإنحدار الخط البياني و تأزم المشاكل
و إفتعال الأزمات....
و طبعاً بطولة الدوري أهم من لعبة تشرين بس برأيي الفوز ببطولة الدوري بيمر من بوابة الفوز على تشرين
(هالحكي ما بهالموسم طبعاً) لأنو غالباً ما بيترافق الفوز على تشرين مع ارتفاع المعنويات و ارتفاع الخط البياني
هادا من ناحية الفريق ...
أما من ناحية الجمهور فأكيد كل واحد منا عندو كتير من أخواتو أو أصدقاؤه التشارنة و بصراحة ما في أحلا من إغاظة التشارنة و الضحك عليون و ربح الشروط وأكل الكنافة و الشاورما و غيرو....
طبعاً هدا الجانب المضيء من الموضوع أما الجانب المظلم فهو اللي بيرافق المباراة من مشاكل و تكسير و حساسيات بين اللاعبين وبين الجمهور.... والله حرام فالمبارة برأيي أحلى ديربي بسوريا لأنو الجمهورين نفس الحجم و الفريقين نفس المستوى و الضجة اللي بترافق المباراة و بستنفر اللادقية كلا قبل بأسبوع و بيرتفع الشحن قبل المباراة بيوم
لأعلا مستوياتو و دائماً الفريق المتقدم أو الفائز جمهورو بيكون أوروبي و منشوف مناظر و مهرجانات غير مسبوقة...
وبالرغم من كرهي لفريق تشرين و بفرح لخسارتو و كأنو حطين فاز بس بتمنى أن دائماً تشرين و حطين يكونو من كبار الدوري و يتنافسوا على البطولة لأنو بيكون الدوري أحلى و الفوز على تشرين وقتا أحلى وإلو طعم تاني
المهم بالموضوع أنو صحيح أنو أجمل شي بالمباراة هو حساسيتا بس المقرف لما ببتحول هالحساسية لتعصب أعمى و ممارسات مقرفة متل:
1. شتم الجمهورللجمهور التاني بسبب و بدون سبب ,ليش ما دائماً في بالجمهور التاني أصدقاء و أقارب و حتى أخوة إلنا فمعقول حدا يسب أخو بأمو و أختو؟؟؟؟؟؟؟؟؟؟؟
2.شتم الجمهور للاعبين بسبب و بدون سبب و بطريقة مقززة
3.بيتحول بعض اللاعبين لطرف بهالممارسات و بيصير هم اللاعب يكسر لاعبين من الفريق التاني وبيوتر حالو و اللاعبين و الجمهور و عالأغلب بينطرد و بيإذي فريقوا
4.دائمأ جمهور الفريق الفائز أو المتقدم بيكون جمهور أوروبي هدا حلو بس ليش الجمهور التاني بس يخسر أو يتأخرببلش مشاكل مع بعضوا و مع الجمهور التاني و بيصير يسب لعيبتوا و بيصير الكل مدربين و هدافين وحراس و إداريين
5.ليش المشاكل بعد كل مباراة قدر محتوم يعني ما بيصير يرجع الواحد على بيتوا بعد اللعبة الا جري هدا إذا وصل سليم
6.على الأغلب الفريق و الجمهور الخاسر بيحمل الحكم المسؤولية , ما يعني هدا أنو الحكام دائماً ممتازين بس الفريق أول شي لازم بيعمل اللي عليه و لما بيلعب منيح و بيخسر بسبب الحكم و قتا مقبول الحكي.
و أنا بقترح شوية شغلات بتساعد على تحويل المباراة لأجمل الدربيات العربية:
1.اللاعبين إلون دور كبير يعني اللاعبين بقدر ما بيكونو هادئين بتخف الإنفعالات لأنو أغلب الأوقات اللاعبين هني بيكونو السبب ببدء المشاكل في المدرجات و طبعاً اللي بينطبق على اللاعبين بينطبق على الإداريين و المدربين
2.تفعيل دور روابط المشجعين و تبادر لتهدئة أي إنفعال أو مسبات أو مشاكل
3. فتح كل الأبواب ببداية المباراة و نهايتها لتخفيفالزحمة و بالتالي الإحتقان من ورا الدفش و الذل اللي منشوفوا على الأبواب و منتحول لخواريف مو بشر
4.الأهم و الأهم و الأهم هني الشرطة ,اللي على الأغلب بيزيدوا المشاكل بدل من أنو ينهوا , وأنا هون بستغرب من هالموضوع يعني أنا ما بشوفوا كيمياء و شوية إجراءات بسيطة فينون يمتصوا المشاكل فمثلاً ما ضروري تركض الشرطة ورا
العالم بالشوارع لأنو المخربين رح ينبسطوا و يكسروا أكتر بالشوارع و ما ضروري تطلع الشرطة على العالم بالمدرجات و تضربا لتطلع يعني إذا بيفتحوا أبواب الملعب كلا, خلال دقائق بتفضا المدرجات لأنو 95% من العالم ما إلا بالمشاكل
بس بدا تهرب و يبطلو موضة القنابل المسيلة للدموع و استخدام المي من سيارات الإطفاء أفضل بكتير
5. عقد لقاءات دورية بين الإدارتين لمناقشة الهموم المشتركة
6.إقامة مباريات دورية ودية بين الفريقين لتخفيف الحساسية بشكلا المقيت
و انشالله منشوف مباريات دائماً قوية و حلوة و بتنعاد ذكرى الفوز السداسي طبعاً إذا ما 7 أو 8 أو 12 -0 قولوا إنشالله.....
30/11/06
النمط الخطي
