::هل حان موعد التغير ::

[Kh@led]

على ما يبدو .. انو الشي الوحيد يلي بينقص بحطين خلال العقود الطويلة ..و يلي ما حدا عرف يزرعها باللاعبين الشباب .. هي النفس الطويل .. دايما بنشوف فرق القواعد عنا سواء اشبال ناشئين شباب .. تغير دائم بمدربين القواعد خلال الموسم الواحد ..
فاللاعب عنا بنادي حطين .. ما متعود ابدا على مدرب يدربو من اول الموسم لاخرو...
و الادارات في حال تدهور نتائج الفرق عم تحاسب المدرب ..و تنسى انو اللاعبين هم السبب ايضا .. فبنشوف .. بعد ما بتبدا الخسارات تتوالى ... بدل ما اللاعب يحاول يزيد الجرعات التدريبية .. و يشتغل على تطوير حالو... بنشوفو (متل هلاء ) ناطر لحتى يتغير المدرب ..

و بالمقابل .. عم نتعامل مع مدربين دوري فقط .. يعني بندور وين في مدرب يعرف يجيب نقاط بس ما اكتر .. بغض النظر عن تحضير فريق للمواسم المقبلة ...ما رح احكي عن الوضع الحالي كون حكينا كتير ... بس من وجهة نظري ..و وجهة نظر الكل .. التغير صار ضروري جدا جدا .. كون الحالة النفسية للاعبين .. و الشرخ يلي حاصل بين بعض اللاعبين و المدرب عم يادي لهل النتائج...

نتائج الفريق هبطت قبل الاستراحة الاولى للدوري و يلي استمرت مدة شهر .. و وقت دخلنا بفترة الاستراحة .. الكل اتامل انو الكابتن احمد يعرف كيف يرجع الوضع متل ما كان اول الدوري ... بس للاسف و متل كل مرة زادت نتائج الفريق سوء و ما قدم اي شي جديد...

فلهيك لازم تستغل فرصة توقف الدوري بسبب التاجيل و بسبب انتهاء مرحلة الذهاب و تنعاد حسابات الفريق مع دم جديد ..و جهاز اداري و فني جديد .. لانو اذا ما عرفنا نطلع من هل الورطة يلي نحن فيها .. الهبوط للدرجة التاني لا محال ..

تعقيب الكلام من وجهة نظر شخصية لا اكثر ولا اقل )

والله يا خالد اللاعبين عنا بيتعاملوا مع الامور بالعاطفة وكذلك الجمهور والادارة وهالعاطفة عم تخلي كل واحد يحط الحق على التاني
وكتير عم تأثر هالشغلة علينا ...
يعني انا مثلا كلاعب ليش لحتى اخد موقف من مدربي وهدا ياخد موقف
ليش ما انا بطور حالي وبحسن من ادائي كرمال هالجمهور وكرمال اسم النادي ...
بس لا نحنا عنا جكارة بالمدرب وجكارة بالادارة بقدم مستوى باهت لحتى شوف مخرج للوضع الي انا فيه ولانتقم من المدرب فلاني يلي حرمني باللعبة الفلانية او عملي هيك وهيك
للاسف نحنا كل امورنا بنتحكم فيها بالعاطفة وهيدي سبب كافي لقصر النظر عنا
بدنا كلشي بسرعة ودوما بندور عالحلول المؤقته وهدا اكبر سبب لفشل اي مؤسسة سواء كانت فريق قدم او اي شي مشترك بين الناس
طبعا العلاج الحالي والمؤقت هو تغيير المدرب لحتى نقدر حاليا انو نتخطى هالازمة النفسية وهالاحتكاك السلبي بين اللعيبة والمدرب والجماهير
بس اكيد هالحل ومتل كل مره رح يكون مؤقت
بيجوز يطلعنا من الحالة الي نحن فيها بس الشي الاكيد انو مارح يغير شي في المنظور البعيد
ورح نضل من سيء لاسوأ طالما عم نحكم عالامور بهالطريقة ....

[Rammstein]

طبعا تغيير المدرب هو الحل يعني والله هاد الحكي مو منطق نوب كل مرة مندخل على الملعب ومنطلع مسموم بدنا من ورا اللعبة شو هل الحكي بدو يضل فريقنا كل سنة ينافس على القاع وخايفين ما ننزل والله العظيم عيب يعني ماعاد في بالنادي مين ياخد قرار ويوقف بوش هل المهزلة اللعيبة مفكرين حالن كل واحد فيهن .. وطبعا في لعيبة منقدر اسمها وتاريخها متل السيد بس ما عم يعطينيا المستوى المطلوب منطلب منو بأخوية يا سيد رجعلنا لمستواك .. او تروك الفرصة لغيرك والأهم من هاد كلو الهواش ما عم يساوي شي .. ولا عم يطورنا بالعكس عم نرجع لورا وبفخر وعم نلعب بلا خطة وبلا تكتيك يعني عليهن يا عرب .. وأخرة هل الحالة بدنا الادارة تتصرف وتغير المدرب وتجيب شي مدرب فهمان وكل سنة مشكلتنا هل المشكلة يعني ما رح نمشي خطوة لقدام الا مقابيلها 50 خطوة لورا

والله يا اخوي في كتير عوامل عم تأثر علينا ما بس المدرب
العامل النفسي عم يلعب دور كبير يعني من 3 سنين لهلأ عم نمر بنفس المشكله والسبب مافينك تحصروا بشي واحد
يعني هالسنة كملت معنا تمام
لا مدرب ولا لعيبه ولا خطه ومافي تحضير ومافي جدية وفوق كل هدا ولدنات عالفاضي
والله صار بدنا معجزه لنطلع من هالحاله

[abu kamal]

ولله ياخالد مافي غير هالحل بس لازم يكون التغيير ما تتغير روتين متل العادة لازم تتتغير الأسماء ضروري كتير وكان لازم يصير قبل هلأ بكتير
لأني هاد الحل الوحيد حالياً

[الحوت المهاجر]

كلام حلو اخ خالد والشباب كمان تعلقياتها منطقية وواقعية وانا بأيد الاخ ابو كمال انو

لازم نرجع للقواعد لانهم امل النادي وياريت يرجع الكابتن كيفورك للقواعد لانه بظن

الاقدر والاجدر على هادي المهمة وكمان بدنا مدرب كبير باسمه وتاريخه للفريق الرجال

واهم شي شخصية قوية وما يخاف من اي لاعب ومصلحة الفريق فوق مصلحة الكل

بالتوفيق لحوتنا الغالية

[hutteen my love]

أنا رأيي لازم يبدأ التغيير من أعضاء الادارة ومن ثم بالكادر الاداري والتدريبي لفريق الرجال

[syriana]

لك الله يرحم ايام ابو رحوم ..

[عبد الباسط حجازي]

وبعدهيك يعاملوا اللاعبين بمبدأالثواب والعقاب ولازم يكون عنا نفس تدريبي جديد وبعتقدوهاد راي شخصي اننا لازم نرجع للعب بطريقة الدفاع والظهيرين الثابتين والهجومالمرتد واعتقد ان افضل مدرب يعرف تطبيقها عبدالناصر مكيس

[ذئب روما]

نحنا بزمن المستقبل والحاضر وما بدنا نترحم على حدا ..اللاعب من نفسو لازم يحس بالمسؤولية من منطلق نفسو ..بعدين بتيجي مهمة المدرب اللي بدي يشد همة اللاعبين وبعدين الادارة من جميع الجهات ومن هون بدنا نبلش ...والحل رح يطلع من هون بس ما تخلو ولا متشائم يحكي أبدا ..عداك عن النتيجة لما حضرت الملخص لمباراة الحوت بحماه والله العظيم عندهن دافع قوي للتسجيل بس الاهداف بتيجي علينا اما من خطأ الحارس اكتر شي او معظمها من الدفاع ..منشان هيك الحل موجود اكيد شايفينو بس متجاهلينو ولا أعرف ما هو بالنسبة الي.. اما ان نسجل واما ان لا ندع أحد أن يسجل علينا ومع هذا نبقى بالمراتب الاولى وبس....... تحياتي


ذئب روما

[محمد نور]

النادي كلو بدو نفض
من مبنى لإدارة لمدربين
المهم ما نقعد ونتحسر
وتدخل اللجنة التنفيذية لتحل هالمسخرة اللي بالنادي

[الآغا]

أرسل أصلا بواسطة abu kamal

ولله ياخالد مافي غير هالحل بس لازم يكون التغيير ما تتغير روتين متل العادة لازم تتتغير الأسماء ضروري كتير وكان لازم يصير قبل هلأ بكتير
لأني هاد الحل الوحيد حالياً

36_1_11[1 36_1_11[1 36_1_11[1 36_1_11[1

[hutteen love story]

الاهتمام بالقواعد واداره ثابته هذا ما يريده حطين فقط0اما فريق الرجال الحالي نفضوا ايدكم منه

[YOUSEF..MS]

فلهيك لازم تستغل فرصة توقف الدوري بسبب التاجيل و بسبب انتهاء مرحلة الذهاب و تنعاد حسابات الفريق مع دم جديد ..و جهاز اداري و فني جديد .. لانو اذا ما عرفنا نطلع من هل الورطة يلي نحن فيها .. الهبوط للدرجة التاني لا محال ..



لازم

[نوار مالك مجبور]

أرسل أصلا بواسطة hutteen my love

أنا رأيي لازم يبدأ التغيير من أعضاء الادارة ومن ثم بالكادر الاداري والتدريبي لفريق الرجال

بالفعل هيك لازم 36_1_11[1


أبو النور

[NARAMoo]

أرسل أصلا بواسطة hutteen my love

أنا رأيي لازم يبدأ التغيير من أعضاء الادارة ومن ثم بالكادر الاداري والتدريبي لفريق الرجال

هاد الكلام السليم 36_1_11[1

[BaTiGoAl]

هو ما في شي ما لازم نغيرو...... الصراحة

[حمودة الحطيني]

.... حتى نفسية اللاعبين لازم نغيرها ..... يعني بالمختصر التغيير شامل و كامل