كيف الشباب
و الله هالذكريات شي ببكي من الفرحة و الحزن بنفس الوقت
الفرحة على ذكريات رائعة و جيل ذهبي مامر و لا رح يمر على حطين أو سورية متلو
و الحزن على بطولة دوري ضاعت بسبب النقاط السهلة اللي راحت منا و اللي لو جمعنا نصا لكنا من أبطال الدوري
و بصراحة هالأرشيف الرائع اللي قدمو المميز جداً أبو البحر رجعني لذكريات رائعة وقت ماكنت أول ما ع روح عالملعب و وعيت على فريق رائع و مباريات أروع و المباريات المذكورة كأني مبارح حضرتا و حابب علق على بعض هالمباريات سواء كذكريات شخصية أو لقطات من هالمباريات:
ذهاب
1- حطين - تشرين ذهاب 2-1 بحياتي ما بنسا ها اللعبة كنت وقتا صف تامن و كانت المباراة يوم اثنين حسب ما بذكرو كان عنا مذاكرة عربي و رغم هيك هربنا من المدرسة أنا و أربعة و رحنا عالمباراة و كان الملعب مختوم عالآخر و طبعاً ما في داعي أحكيلكن عن الفرحة العارمة و بالنهاية الجانب المظلم من الموضوع أنو أخدنا صفر عالمذاكرة و فصل من المدرسة مع استدعاء ولي الأمر
2- حطين - الحرية 4-2 حسب ما بتوقع بهالمباراة سجل عارف الآغا أول هدف إلو مع الرجال
و كانت هالمباراة رائعة و مثيرة و مستواها الفني رفيع و خاصة من حطين و بذكر يوما عنونت
جريدة الإتحاد " الجمهور الكرو ي في سورية يرفع قبعات الإحترام لفريق حطين "
3-حطين -الإتحاد 4-1 كانت المباراة يوم خميس و على الرغم من أنو الإتحاد كان بطل الدوري
السابق بس هالشي ما نفعوا قدام التسونامي الحطيني اللي كان عم يجتاح كلشي
4- حطين - الوحدة 1-0 كان من أصعب الإنتصارات و عذبنا فريق الوحدة كتير
و ضاعت فرص كتير منا قبل ما تجي ضربة الجزاء بآخر الوقت
5- حطين - الكرامة 2-2 شو بدي أحكي لأحكي عن هالمباراة و شو بدي احكي لأحكي عن الملك الفنان سليم جبلاوي , مباراة و لاأروع فبعد بداية كرماوية صاعقة و هجوم عنيف تقدم الكرامة بهدفين واحد منن لتامر االوز و ضل اللعب لصالح الكرامة حتى الدقيقة 60 و بلش الهجوم الكاسح الحطيني لمدة تلت ساعة سجل فيها الفنان سليم جبلاوي اسموا بين المبدعين بعد ما سجل هدفين و لاأروع الأول من على خط ال16 تسديدة على الطاير و الثاني و اللي هو الأروع من على خط الجزاء العمودي ما الافقي تسديدة على الطاير إجت لوب يمكن البيرقدار بحياتو ما بينسيها
6-حطين - ش.حلب 2-1 على الرغم أنو كان فريق شرطة حلب ضعيف بس كبر بهالمباراة و جارى فريقنا و عذبو كتير قبل مانفوز بصعوبة بالغة
7- حطين - المجد 2-3 هالمباراة كانت أول مرة ببكي فيها بسبب خسارة و كان طعم هالخسارة مر كتير و خاصة انو ضلينا كل الذهاب متصدرين و بالمباراة الأخيرة خسرنا و هربت الصدارة منا لصالح الكرامة
اياب
8-حطين - تشرين 1-1 سجلنا أول شي عن طريق الآغا حسب ما بذكر بعد عدة تمريرات ثنائية رائعة بين الآغا و الجبلاوي و ضلينا متقدمين حتى الدقيقة تسعين إجت ضربة ركنية لتشرين شتتها الدفاع بس كملا شادي مرعي من على خط الجزاء تسدية إجت بالمقص و كان يومها الشبك مخزوق و طبعاً الحزن ماكان إلو قيمة على فوز ضائع
9-حطين -الحرية 1-0 هالمباراة كانت يوم خميس و كانت منقولة تلفزيونياً و كان وقتا في مطر بحلب و بعد أداء رائع من فريقنا سجل عمار ياسين براسو بعد ضربة حرة مباشرة انرفعت و تابعها الياسين بطريقة رائعة براسو بسقف المرم و طبعاً توقفت القلوب بالدقيقة 90 بعد مانفذ مصطفى قادير ضربة حرة مباشرة من على خط 16بسالله ستر و الطابة ضربت بالعارضة
10- حطين - الشرطة 1-2 هالمباراة كانت تأكيد على عادة حطين الدائمة بإضاعة المباريات السهلة و كان أداء الفريق سيء بهالمباراة و ساعد على هالشي أداء الشرطة المقيت التقليدي و خطتوا المعروفة 9-1بقيادة "الغائب الحاضر"(حاتم الغايب)حسب تعليق وجيه شويكي (الله لا يذكروا بالخير) و رغم هالشي استفاد الشرطة ببداية الشوط التاني من هشاشة دفاعنا و سجل هدفين بأول خمس دقائق و مانفع هدف سامر حاج بآخر المباراة بتعديل النتيجة
11-حطين -جبلة 1-0 بهالمباراة سجل آغا الهدافين عارف الآغا واحد من أجمل أهداف الدوري بعد ماتابع عالطاير و هو تقريباً على الأرض من على حافة الجزاء عرضية جمال كاظم بالزاوية البعيدة عن عبد الفتاح عبد القادر
12-حطين - الوحدة 0-3 رغم أنو كنا أحسن من الوحدة بس رغم هيك اقتنص الوحدة تلت أهداف بالشوط الأول و ساعد على الخسارة أنو عارف ما كان بمستواه بهالمباراة و ضيع أكتر من فرصة محققة بالإضافة للهدف الأول اللي أكلناه و اللي كان من الاهداف المضحكة بعد ما سدد أسعد زحاليق من 40 متر أرضية خفيفة و بسبب سوء أرضية ملعب الفيحاء نطت الطابة قدام مازن أحمر و دخلت بالمرمى و يومها علق وجيه شويكي (الله لا يذكروا بالخير)تعليقوا الشهير( و أسعد زحاليق يزحلق كرة من 40 متراً و يسجل هدفاً)
13-حطين - الكرامة 1-4 أكيد الكل بيذكرها منيح فبعد تلت ساعة رائعة من فريقنا و هجوم كاسح ما بعرف شو صار بعدين و كانت الخسارة القاسية و الأحداث المؤسفة و بصراحة مابدي أذكر هالمباراة
14-حطين -ش.حلب 1-0 كان الفريق تحت ضغط مباراة الكرامة ونتائجا و قدم مباراة متوسطة قدام فريق سهل و رغم هيك تأخر الفوز حتى الدقيقة الأخيرة بعد رأسية من سامر حاج عمر و بهالمباراة ضاعت فرصة من عارف الآغا بطريقة لاتصدق و ممكن تنحط بطرائف رياضية بعد ماخلص تلت لاعبين و انفرد بالحارس نيموا عالأرض و صار على بعد مترين من المرمى المكشوف تماماً و بوضع مريح جداً و رغم هيك شاطا خفيفة و اجت جنب القائم
الأيسر
و بصراحة كل ماأتذكر هالموسم بفرح بس بسرعة بيجيني إحساس المرارة على بطولة ضاعت
و شكراً
24/01/07, 04 :20 04:20:04 PM
screen.width-500)this.style.width=screen.width-500;" border=0> 
[/align]
النمط الخطي
