كيف الشباب:
بعد ما قام الأخ أبو البحر بتقديم ملف رائع عن بطولة الدوري لموسم 95-96 و اللي كان فريقنا على بعدأمتارقليلة جداً من الفوز بالبطولة ,بوجود جيل ذهبي من أروع اللاعبين الشباب ..... راح تابع المسيرة وقدم ملف تاني عن بطولة دوري ضائعة بموسم 1999-2000 و اللي كان للأسف من آخر المواسم الذهبية للحوت و بلش من بعد هالموسم إنحدار الخط البياني للفريق وتحول من فريق منافس على البطولات إلى فريق منافس على الهروب من الهبوط للدرجة التانية ....المهم موسم 1999-2000 من جديد كان غصة لكل حطيني و كان تكرار للحكاية التقليدية بضياع البطولة بمباريات سهلة ورغم كل شي قدم الفريق مباريات رائعة و أحلى شي بهالموسم كانت المنافسة الساحلية الكبيرة بين فرق حطين و تشرين و جبلة و احتلوا بالنهاية المراكز التلاتة الأولى و كان فوز جبلة باللقب بطريقة غريبة , فبعد ما كان حطين و تشرين عم يتنافسوا كل البطولة و عم يتبادلوا الصدارة و الوصافةكان جبلة عم يزحف من الخلف بكل هدوء و استغل بالنهاية سقوط فريقنا و فريق تشرين بالمرحلة قبل الأخيرةو أحرز اللقب .....
فريق حطين بهالموسم دربوا المدرب كيفورك ماردكيان و حقق الفريق 15 فوز و 5 تعادلات و 6 خسارات
و سجل الفريق 48 هدف و دخل مرماه 21 و كان الفريق صاحب أقوى خط هجوم و أقوى دفاع و كان هداف
الفريق عارف الآغا ب 21 هدف و أحرز هداف البطولة ....
و توزعت الأهداف و النقاط بين الذهاب و الإياب كما يلي:
فوز خسارة تعادل لنا علينا النقاط
الذهاب 8 4 1 23 8 25
الإياب 7 2 4 25 13 25
و بالنهاية كان الترتيب :
1- جبلة 51
2-حطين50
3-تشرين50
نتائج المباريات :
ذهاب
الكرامة-حطين 0-0
أول مباراة بالدوري بحمص و كان في غياب كبي رللاعبين عن الفريق و بالمقدمة
عارف الآغا و رغم هيك اقتنص فريقنا نقطة جيدة من أرض الكرامة ببداية المشوار
حطين - الجهاد 3-1 جمال كاظم 20 و عارف الآغا 38 و 43 الجمهور 8000
بعد عودة اللاعبين المهمين بالفريق بعد ماكانوا حردانين بالجولة الأولى عادة الروح للفريق
و قدم الفريق أداء راقي توجوا بفوز مهم جداً
الوحدة - حطين 1-0
قدم فريقنا بهالمباراة أداء لا بأس فيه بس رغم هيك كان فوز الوحدة تأكيد على عقدة حطين
مع الوحدة بدمشق
حطين - الجيش 2-1 سليم جبلاوي 35 و عارف الآغا 59 الجمهور 8000
بهالمباراة قدم الفريق نفسه كمنافس مهم على البطولة بعد ما ألحق الخسارة الأولى بفريق
الجيش بعد 36 مباراة بلا خسارة (حسب ما بذكر) , و قدم الفريق وحدة من أفضل المباريات
بتاريخوا , سجل الهدف الأول سليم جبلاوي بعد هجمة مرتدة ممكن تدرس بأرقى المدارس الكروية سلسلة تمريرات و لا أحلى (لمسة و باص) من علي طه إلى عارف إلى جمال إلى سليم اللي سددا من على خط السته بطريقة رائعة , الهدف التاني سجلوا الآغا بطريقة أوروبية بعد ما سرق الطابة من مدافع الجيش و خاد و هوت مع الجبلاوي دخل الجزاء و راوغ مدافعين و سددا بالقدم اليسرى أرضية عن يمين البيروتي , و قبل النهاية بعشر دقائق قلص الجيش الفارق بعد خطأ فادح من الحارس عمر عكيل و رغم هيك استطاع فريقنا يحافظ على النتيجة حتى النهاية
تشرين - حطين 1-3 عارف الآغا 21 , 55 و علي طه 90 الجمهور 35000
يعني شو بدو الواحد يحكي ليحكي يعني إذا منفوز على تشرين بمباراة ودية بيكون الفوز
إلو نكهة فمابالكن بفوز ثلاثي و على ما يبدو جمهور و فريق تشرين ما كان لسا مستوعب
آثار الهزيمة التاريخية السداسية بآخر مباراة بين الفريقين بإياب الموسم السابق و استمر
الطوفان الحطيني بس هالمرة بثلاثية بلشا عارف الآغا بعد ما هدا بصدروا داخل الجزاء
رفعة سليم جبلاوي و تابعا على الطاير أرضية عن يسار حارس تشرين و بنهاية الشوط
عادل تشرين النتيجة و مع بداية الشوط التاني ضغط حطين بقوة و بعد عشر دقائق
سجل الآغا هدف رائع فبعد ما استلم عرضية جمال كاظم داخل الجزاء خلص المدافع و الحارس و نيمون على الأرض و رغم أن الحارس و المدافع و هني على الأرض كل واحد مسك رجل
لعارف بس هالشي مامنعوا يتابع الطابة بفدائية كبيرة داخل المرمى, ومع نهاية المبارااستفاد
علي طه من خطأ حارس تشرين اللي لعب ضربة مرمى خفيفة خطفا علي طه من المدافع
و سار فيها تقريباًمن نص اللعب و واجه الحارس و سجل بسهولة و بلشت الأفراح على
المدرجات الحطينية
حطين - الحرية 0-2 عارف الآغا 60 , 82 الجمهور 15000
بهالمرحلة كان حطين ولأول مرة بيعتلي الصدارة و تصدر الفرق بفوز مستحق على فريقالحرية
بهدفين للآغا بعد ما أطبق على مرمى الحرية من أول المباراة لآخرا و ما سمح لفريق الحريةيفكر شو يساوي و كانت هالمباراة امتداد للطوفان الحطيني اللي كان عم يجتاح الفرق
الوثبة - حطين 1 -0
مباراة غريبة مابعرف تفاصيلا اللي بعرفوا أنو خسرنا بالدقيقة 90 بضربة جزاء و كان الفريق
اسوأ حالاتو و كان عمينحكى بالأسبوع قبل المباراة عن مشاكل بالفريق(يعني كالعادة بس يحقق الفريق الإنتصارات ببلشوا أعداء النجاح النخر )
حطين - جبلة 1-0 علي الصوفي 47 الجمهور 20000
عاد الفريق بهالمبارة إلى نغمة الفوز بعد نكسة الوثبة و سجل الهدف علي الصوفي بأول الشوطالتاني بعد تمريرة بينية رائعة من الآغا انفرد و سجل من زاوية صعبة و الله سترنا بالدقيقة الأخيرةمن ضربة جزاء بعد ما ضربت الطابة بإيد بشار سرور على خط المرمى بشكل واضح بس الحكم أعتبر اللمس غير مقصود و أثارت هالحالة جدل كبير
المجد - حطين 0-4 جمال كاظم 5 سليم جبلاوي 26 علي طه 78 84
قدم الفريق أداء رائع توجوا بفوز مستحق خارج أرضوا
حطين - المحافظة 5-0 جمال كاظم 28 عارف الآغا38 50 85 زياد شعبو52 الجمهور 15000
استعرض حطين بهالمباراة عضلاتو و حقق فوز كاسح بخماسية و كان فريق المحافظة بهالموسم ببكي بعد ما جمع نقطة واحدة فقط كل الدوري
الفتوة - حطين 1-0
خسارة منطقية لعدة أسباب :1- عودة النخر إلى الفريق من أعداء النجاح
2- حرد هداف الفريق عارف الآغا بسبب عرض خارجي رفضتوا الإدارة
3-صعوبة فريق الفتوة بأرضوا و خاصة أنو الفتوة كانت نتائجوا جيدة وترتيبوا التالت
و الصعب بالموضوع أنو خسرنا بالدقيقة الأخيرة
الشرطة - حطين 2-1 عمار ياسين 88
استمرار ضياع الفريق و استمرار حرد عارف الآغا و بعد التأخر بهدفين مانفع هدف عمار ياسين بآواخر المباراة من تعديل النتيجة
حطين - الإتحاد 2-0 بشار سرور 85 شهاب الدين برو 89 الجمهور 12000
بهالمباراة استمر غياب هداف الفريق عارف الآغا و رغم هيك رجع الفريق
للعروض القوية و حاصر الإتحاد أغلب أوقات المباراة و ضاعت الفرص بشك لا يصدق و تحول حارس الإتحاد لحيط سد المرمى و ضل الوضع هيك حتى الدقيقة 85 , نفذ بشار سرور ضربة حرة مباشرة بطريقة رائعة بسق المرمى عن يمين حارس الإتحاد و بعدا بدقائق تابع شهاب الدين برو عالطاير كرة بالمقص الأيسر لمرمى الإتحاد و انتهت المباراة بفوز غالي و كانت هالمباراة آخر مرحلة بالذهاب
الإياب
حطين - الكرامة 1-0 شهاب الدين برو 32 الجمهور 15000
كانت هالمبارة يوم راس السنة و قدم الفريق أحلى عيدية للجمهور بفوز صعب على الكرامة
بهدف لشهاب برو بعد ضربة ركنية تابعا برأسوا و رغم الفوز بس الأداء ما كان كتير مقنع
الجهاد - حطين 3-2 عارف الآغا 24 62
بداية ساحقة للجهاد أول ربع ساعةمع ضياع تام لفريقناو المحصلة 3 أهداف بعدها استعاد فريقنا الوعي و قلص الآغا الفارق بس النتيجة ضلت للنهاية
حطين - الوحدة 0 - 0 الجمهور 200
من المباريات المؤلمة , كان تاني أيام العيد و كان المطر كبس و رغم هيك رحت عالملعب بجو عاصفي و رغم الحصار المطلق لفريقنا على فريق الوحدة بس الطابة كانت عم ترفض تدخل المرمى و مرتين و قفت على خط المرمى بسبب المطر مع فدائية حارس الوحدة و انتهت المباراة سلبية
الجيش - حطين 1-2 عارف الآغا 67 و جمال كاظم 84
الفوز الأغلى لحطين هالموسم فبعد ما تقدم الجيش بهدف بعد نص ساعة ضغط فريقنا و حرموا الحكم من ضربة جزاء واضحة بعد ما أبعد الجبان الطابة من على خط المرمى بإيدوا , و تواصل الضغط بالشوط التاني و سجل الآغا التعادل ومع نهاية المباراة رسم جمال كاظم الفرحة على الوجوه بعد ماسجل هدف الفوز بطريقة قتالية فبعد مارجع مدافع الجيش الطابة للحارس تابع جمال الركض و ضغط على الحارس اللي حاول يشتتها بس ضربت بكتف جمال كاظم اللي تابعا بسهولة داخل المرمى
حطين - تشرين 0-0 الجمهور 40000
المباراة الأسوأ بذاكرة جمهور الفريقين , المباراة المتفق عليها, قبل المباراة كان حطين الأول و تشرين التاني بفارق نقطة و كانت معنويات فريقنا بالقمة بعد الفوز الغالي جداً على الجيش بدمشق و كان الجمهورعم ينتظر واحدة من أقوى لقاءات الفريقين بس قرار القيادة السياسية و الأمنية بالمحافظة كان غير رأي الجمهورين, و مرت المباراة بطريقة رتيبة و ببطء شديد وبشكل ممل و انتهت سلبية الأداء و النتيجة
الحرية- حطين 3-1 بشار سرور 89
عرض سيء و خسارة مستحقة
حطين - الوثبة 5-1 جمال كاظم1 و علي طه55 57 و عارف الآغا 70 81 الجمهور 8000
فوز عريض و مستحق و بسهولة
جبلة - حطين 1-1 عارف الآغا 17
هالمباراة برأيي السبب الأساسي بضياع البطولة و من بعد هالمباراة زحف جبلة للقمة و دفع الفريق ثمن الفرص الكتيرة اللي ضاعت على مدار الشوطين قبل ما يسجل جبلة التعادل بالدقيقة الأخيرة بعد ما تقدمنا بأول الشوط الأول عن طريق الآغا بطرقة رائعة و من يوم هالمباراة حرمت أحضر مباراة بجبلة بعد القتل و الحجر اللي أكلنا و كانت العالم من شرفات المنازل ترمي علينا يلي بيتوفر بين إيديا و ما بنسا منظر الزلمي اللي كان عم يكب غاز قديم علينا و المهم الله ستر و رجعت سالم محمل بحزن كبير بعد تعادل غير عادل
حطين - المجد 5-1 طلال شومان8 عارف الآغا38 61 علي طه52 جمال كاظم 40 الجمهور8000
تفشش فريقنا بفريق المجد و حمله 5 أهداف ملعوبة
المحافظة - حطين 2-4 عارف الآغا23 بشار سرور 45 طلال شومان 57 فادي مسطو 66
فوز منطقي.....
حطين - الفتوة 1-1 عارف الآغا 1 الجمهور 10000
المباراة الرسمية لضياع البطولة فبعد هدف الآغا بالدقيقة الأولى عادل الفتوة النتيجة و بلش مسلسل إهدار الفرص و مع إصرار اللاعبين على تمرير كل الطابات للآغا ضاعت الفرص و كانت النتيجة الكارثية
حطين - الشرطة 1-0 جمال كاظم 16 الجمهور 5000
فوز معنوي...
الإتحاد - حطين 1-2 علي طه 63 و عارف الآغا 86
فوز معنوي.....
و انشالله يكون هالملف عجبكن و عقبال ما نعمل ملف عن حطين بطل الدوري ...قولوا انشاالله
27/01/07, 03 :09 03:09:48 AM
[/align]
النمط الخطي
