:::...:::: خسرنا المباراة ......ولكن :::...:::

[حطيني مغترب]

بسم الله الرحمن الرحيم

اول شي بحب قول لكل الاعضاء بالمنتدى وكل الجمهور هاردلك على الخسارة القاسية امام الشرطة في دمشق وبتمنى الكل يعذرني لاني ما حبيت اكتب موضوع بعد المباراة مباشرة حتى اقدر كون منصف بكلامي ولو بنسبة بسيطة وحتى ابتعد عن الانفعال يلي كلن واضح بمواضيعكم ويلي مابلومكم عليه نهائيا كون الخسارة مفاجئة بغض النظر عن قسوتها
بس بيقولو بالطب الضرس (المسوس او المنخور) بحال ما شلتو بيأثر على باقي الضراس وبيعملك وجع راس وبيطلع ريحة التم بشعة فلذلك اليوم لاحظك انو في ضرس حطيني انخر
فالحل هون انو نعملو حشوة وبحال مشي الحال بنتركو اما لو مامشي الحال يفضل نقبعو وفهمكم كفاية
انا اليوم مافيني لوم المدرب لانو تعودت بكل مواضيعي احكي الحق
فريقنا اليوم كان منيح كتير بالشوط الاول ويلي خلانا نتراجع بعد الكول الاول هو اندفاع اللاعبين للهجوم وترك ثغرات رغم انو عمار ياسين ما قصر بس للاسف عماد عيسى كان سيئ جدا ونحن بنعرف قبل ما ندخل المباراة انو فريق الشرطه فريق دفاعي بالدرجة الاولى وبيعتمد عالمرتدات فتسجيل اي هدف عالشرطة بحاجة لمهاجم من عيار تقيل وهون بتتكشف اكتر واكتر حاجة النادي لهداف كبير بوزن عارف الاغا وايضا بحاجة لحارس كبير
طبعا مابقدر انكر انو عماد عيسى انقذ الفريق بعدة لقاءات سابقة بس للاسف لازم يراجع حساباتو اليوم وبشكل دقيق
ولما بيدخل فريقنا اي مباراة بمعنويات اعلى من اللزوم بيصير يلي الكل بيخاف منو
وانا بدي وجه رسالة لكل الاعضاء وللاعبي حطين وقلون
هاردلك الخسارة المستغربة وبتمنى يكون عندنا شوية حس بالمسؤولية وخاصة اننا لازلنا بدائر ة الخطر وخاصة انو النتائج ماعم تجي بصالحنا
وبقلون بتمنى انو هالمباراة تكون عابرة ونتحضر تماما للقاء الجار تشرين لانو بنتيجة هالمباراة حسابات كتير بدا تتغير
تقبلوا تحياتي ولا عزاء لحطين اليوم
وبستعير قول حطيني فقط
تصبحون على حطين

[ابو بشار الحطيني]

والله يا اخي العزيز طلع على لساني شعر و انا اقول من بعد لعبة الجيش ان الفريق بحاجة الى مهاجم قناص يجيد استغلال الفرص .........بس بدك مين يسمع.

[الحوت المهاجر]

والله اللاعبين اليوم كانوا بلا حس بالمسوؤلية ولوحظ هالشي بعد الاهداف وما عملت اية ردت فعل عندهم ولعبوا وكانهم فايزين عماد عيسى حكيت كتير عليه انو ما بيعجبني وما بحسو حارس ولو عددنا الاهداف الي دخلت فيه من اخطاء رح تشوفها كتيرة وياريت لو اعتمدنا على حارس شاب وغلط هيك اغلاط كنا كسبنا حارس منيح للمستقبل وبكفي انه حطيني

[abu marwan]

كلامك صحيح بشار
اللوم ما عالمدرب ولاحتى على بعض اللاعبين بس للأسف الحظ ما كان معنا بالاضافة الى انو عماد عيسى ما كان بيوم سعده..

[Phoenicean]

لما فريق بدو يجيب لاعب محترف لازم يجيب لاعب يلعب بأكتر مكان الفريق بحاجته و بما أنو وضوحاً هجوم حطين عقيم و حارسه مهزوز فلازم المحترف يكون بهالموقعين أو بواحد منهن على الأقل ... أو ممكن ترفيع لاعبين من فريق الشباب المميز ... أما التشكيلة الحالية فواضح إنها عصية على الحلول كلها و الله يستر !!! ... مبارياتنا الباقية صعبة ... فعلاً الله يستر !!

[شوماخر]

والله يا بشارو العزيز كلامك دهب بس ليسمع حكيك المدرب والحارس والفريق بأجمعوا
وهون بس سمعوا أكيد بدن يعتبرو كلامك كلام متطفل وما بيفهم شي ....ولتأكيد سأل المشرفين. والمدير السيد خالد وشوف شو بقلك

[SAHED]

المشكلة يا بشار انو الواحد ما عاد يعرف مين بدو يلوم الادارة ولا المدرب ولا الحارس ولا اللاعبين واذا اجيت للمحصلة النهائية مو بس هني بيتحملوا مسؤولية بالعكس كل واحد فينا بيتحمل مسؤولية . والمشكلة الأكبر ما عمنقدر نلائي الشخص المناسب يلي ينوضع بالمكان المناسب ليوحد الاراء والصفوف . لأنو سدئوني اذا بيجي رئيس نادي ويعرف يتعامل مع النادي صح لتلائي الناس كلها وراه وطبعا كلامي هاد مو يعني اساءة لرئيس النادي محمد قدور بالعكس نحنا ما مننسا افضاله على النادي والزلمة دفع وما ئصر بس غيابه الكتير عن النادي اله اثار سلبية ونحنا لازم يكون عنا رئيس نادي ولو على اقل تقدير يتواجد يوميا بالنادي ولو لساعة او ساعتين ويكون متابع لكل شاردة وواردة .

[فاروق ابن البحر]

والله يا بشار كلامك صح المدرب ما عليه لوم ابدا بلعبة مبارح وتبديلاتو صحيحة مبارح مشكلتنا كانت بالحارس يلي ابدا ما كان متوفق بالشوط التاني ولاحظنا اكتر من مرة كيف الطابة عم تفلت منو وما عم يقدر يمسك الطابة بالاضافة لانو ابو الريف ما كان مركز ابدا والفارس ااااااااااااه من الفارس ما كان ابدا فارس وحسيتو كأنو ما بدو يلعب ومروان لك كويس بس محاولاتو بتجاوز كل لعيبة الشرطة دبحتنا بتمنى انو يتعاون اكتر مع زملائو بالملعب و يمرر الكرة لزملائو ما يلعب بأنانية ونهاية بتمنى تكون هالمباراة درس لكل اللعيبة يلي ما كانو مبارح عند حسن ظن الجمهور والمدرب ويعيدوا حساباتون لانو الجاية اهم و اصعب وبخص بالذكر اللعيبة يلي ذكرت اسمائون بالرد


عشتم و عاش حطين

[syriana]

تم الحذف ووضع المشاركة في موضوع خاص
http://www.hutteensc.com/forum/showt...260#post102260

[SAHED]

اخوي syriana بشكرك من قلبي على كلامك الرائع والمنطقي مليون بالمليون وفعلا ما حكيت غير الصح هاد هو جمهورنا من يوم يومه جمهور فوز فقط وجمهور كلو مدربين واللاعب يلي بجبلهم مباراة بصير سوبرمان واذا غلط بالمباراة يلي بعدها بيتحول لمسيلمة الكذاب