:: دعوة للجميع لتقبل الامر الواقع ::

[Kh@led]

بكل الدوريات العالمية بنشوف اندية الها دور ثابت بكل موسم .. يا اما تنافس على البقاء يا اما ما بتنافس لا فوق ولا تحت .. يا اما بتنافس اول الموسم فوق بعدين بتنفسسسسسسسس ياما بتضل كل الموسم عم تنافس ...و الحلو بالموضوع انو جماهير الاندية السابقة متقبلة الامر الواقع .. و ما بيطلبوا من فريقون اكتر من الامكانيات المتاحة..

بالنسة لحطين .. فهو مر بكل الحالا... من وقت ما طلع على الدرجة الاولى لهلاء...بس الفرق بين التسعينات و القرن الجديد ... انو من قبل كان في معمل يصنع لعيبة .. اما هلاء ما في لا معمل .. و لا لعيبة عم تتصنع ..في عنا غرفة بالنادي .. محطوط فيها قالب .. بنجيب اللاعب بنحطو بهل القالب ..لحتى يكبر و يصير رجال .. بنوقعوا و بننسى يا اما اساسي يا اما احتياط..
و هيك صار عنا مليون لاعب مصنوعين من قالب واحد .. و للاسف هل القالب متآكل متل ما بتعرفو العمر الو حق .. فوصلنا دفعة متآكلة .. ما عم نعرف شو شكلها ..ساعة فوق و ساعة تحت .. متل هل الطقس..
بس اللهم .. في دفعة منيحة .. حققت مرتبة منيحة بدوري الشباب .. وكلنا امل بهل الدفعة يلي بعتقد انو ما رح يجي متلها لشي عشرطعش سنة لقدام لانو ما في بالنادي حدا يعمل قالب جديد .. او يرجع يفتح معملنا القديم..

برجع على موضوعي الاساسي يلي هدفي منو .. انو حاول اقنع ككلللللل جمهور حطين يرضى بالامر الواقع و ما يحلم بفريق ينافس على دوري من هلاء لعدد غير معدود من السنين .. لانو ابسط مقومات المنافسة ما موجودة عنا .. لانو ما معقول نادي ما عندو ملعب يتدرب عليه ولا عندو محل سمانة ياجر ... ولا عندو 9 اشخاص بس ممكن يتفاهمو مع بعض و يديرو لموسم واحد بس .. ومنا طالبين اكتر من هيك .. و يرضى بفريق كل سنة ينافس على الهبوط .. بالعكس هيك بيكون في تشويق .. احسن ما كنا انمل .. متل ما مرت فترة علينا .. بنص الاياب كنا نكون حاسمين السابع بالرتيب...

والله جمهور ايفرتون ... توتنهام .. ريجينا .. كالياري... غالكسي ... ليتشي .. نابولي منو افهم من جمهورنا لحتى يرضو بوضع انديتون.. كيف ما نكون متل نابولي ... بعد ما اخد كاس الاتحاد الاوروبي و الدوري الايطالي و لعب عندو مارادونا .. هلاء صرلو شي سنتين بالتانية..

لذلك ... ارضى بالنصيب .. وارتاح للحبيب ... على قولة ابو وديع ..لانو الحمدالله خلال 3 سنين ما في شي الا و ما جربناه ... فريق محترفين جبنا .. وما طلع معنا شي .. ادارة خبيرة جبنا و ما طلع معنا شي ... ادارة مال جبنا و ما طلع معنا شي... فريق من شباب النادي عملنا .. وما طلع معنا شي...

و القادم مذهل اكثر

[YOUSEF..MS]

انا معك بكل كلمة قلتها ...
لازم نرضى بالامر الواقع بس ما لازم ننسى او نتراجع عن هدفنا يلي هو تحسين الواقع..
اللي صار صار ومستحيل نرجع ثانية للوراء
وهلق جميعنا لازم نتكاتف ونوقف مع الفريق وننسى كل المشاكل وكل الهزات اللي مرت بالفريق ونلتفت للمباراة القادمة ياللي هي بمثابة الدوري عندي...

[La Balena]

والله ياابو الخل كلامك كلو جواهر وببصم عليه بالعشرة

لك اليوم بعد كل كووول ناكلو اسبح ربي مليون مرة مشان ماتفلت اعصابي بس قلت لحالي ليش لحتى اعصب ومو رايحة الا على صحتي

ماهدا هو حال نادينا

وبالعفل اذا عندنا 9 اشخاص وماعم يحسنو يتفاهمو مع بعض ولمدة 12 شهر بس

هي اهم نقطة الاستقرار

وكل نهار مدرب شكل

بقى بدنا يصير عنا فريق مثل العالم والبشر

ونحنا مفينا نقوول الله يجيب العواقب السليمة يارب

وتحياتي الك خالد الغالي

اخوك رضا

[حطيني مغترب]

هادا هو الواقع الحطيني وهذه هي الثوابت الحطينية الي حكيتكم عنها من فتره
وكلام خالد مزبوط يا شباب فعلا ومتل ما قلت من قبل هالنادي مستحيل انو يرسي على شي
يا فوق يا تحت يا قمحة يا شعيرة والله احترنا واحتارت الرياضة معنا

[شوماخر]

والله يا ابو الخلود ...
كل الحكي الي حكيتو كلام متابع لحطين من الطفولة الى يومنا هذا ...ولو ضليت 10 سنين لقدام رح يضلوا متل ماهنة ....
كل مالدينا أن نفعله هو المحافظة على موقعنا لعلهم يتفهمون ما قد أوصلناهم اليه بينما هم عاجزين عن تحقيق ولو فرحة صغيرة لجمهورهم الذي بدا عليه اليأس ولو بمبارات يحلم فريق من الدرجة الثانية ان يفوز بها على فريق ترتيبه الاخير من الدرجة الاولى....
وصراحة بالنسبة الي لا اوثق برجالنا في مبارات تشرين

[الحوت المهاجر]

كلام سليم والاخ خالد اكيد عايش الواقع عن قرب واكيد الظروف المحيطة هي يلي وصلته للدرجة هادي من اليأس وفقدان الامل بس مع كل هالشي رح يجي الفجر الجديد عاجلا ام اجلا ان شاء الله

[أحمد وزان]

كلام عم ينعرض فيه الواقع بطريقة أخرى
بس بدي أول كلمة وحدة
انسى غرامك راح؟؟؟؟؟؟

سلمات

[SAHED]

فعلا خالد حطيت ايدك عالجرح ومن زمان حكيت هالكلام هاد نحنا وهي الفريق تبعنا وهي امكانياتنا ومو مهم توفر المال وحده وما بتظبط بتوفر الروح العالية وحدها لأنه اذا ما اجتمعت كل المقومات اللازمة للنجاح من مال الى كادر تدريبي متفاهم الى ادارة واعية ومتفاهمة الى لاعبين يلعبون بوفاء لقميص ناديهم . فبعمرنا مرح ندوء البطولة ولا حتى الوصافة .

[أبو هشام الحطيني]

انا برفض هالحاة الانهزامية و المستسلمة

من إيمتى كنتو هيك ؟

هلّق هيدا هو التبرير اللي شايفينو مناسب للي عم نمر فيه

سدئوني يوم بعد يوم عم فكر اكتر بفكرة الهبوط عالدرجة التانية

يعني شوفو وين صار تفكير العديد من جماهير النادي (الهبوط كحل جذري)

لأ

أنا برفض هالحالة اللي عم نمر فيها و لازم ينوضع لهلمرحلة حد

[فاروق ابن البحر]

يعني ما بعرف من وين بدي ابدا
مواهب عنا ما فينا نقول غير هيك
استقرار مادي طول عمرنا بنحلم فيه وتحقق هالحلم
ملعب تدريبي خاص رح يبقى حلم الى ما شاء الله
حب واخلاص لاسم حطين من بعض الموجودين داخل النادي انسى
اللعيبة كل مباراة بمستوى شكل تعودنا
بنربح على احسن الفرق وبنخسر مع فرق القاع لييييييييييييييش



والمشكلة انو بنبقى بنعشق حطين و برجع بقول ما بدنا لا دوري ولا كأس بس بدنا حطين يرجع متل ما كان يلعب ويمتع هالجمهور العاشق لك رضيانين كل موسم بالمركز التالت او الرابع اما نقول حطين من فرق النص فهادا الكلام يلي ما بنرضاه


عشتم وعاش حطين

[BaTiGoAl]

بحب بس احكي كلمة .....
ما في فريق بيبقى بالقمة وكل طلعة بعدها نزلة..... ولو كانت لفترة طويلة....
المشكلة طلعنا طلعة وبلشنا النزول وما عم نحسن نقدر نمشي خطوة بالطلعة الجديدة...
النقط اللي ذكرها خالد كتير مظبوطة للاسف اخي ابو هشام هاد الواقع ....
ما فينك تهرب من الواقع برايك شو السبب اللي خلانا نتعادل مع الجيش؟؟؟؟؟
الامور كانت ممتازة والخطة رائعة والمدرب بكل معنى الكلمة كان مدرب اروبي
انظر للاعبين؟؟؟؟!!!!!
ما حدى عم يلعب من قلب ورب .... ما في حماس ((طيب هي شو حلتا)) ما في حل لانو الياس ركب عقول اللعيبة والقناعات الخطأ نفس الشي حاليا بتمنى ولو اني يمكن يكون قرار ظالم..... بحق بعض اللعيبة لكن بتمنى فريق الشباب كلو بكاملو يترفع بدل هالجيل الكامل .... وجيل الرجال الحالي ..... أثبت فشله باستثناء لاعبين ما اكتر ....
مع احترامي لجميع اللاعبين لكن هاد الواقع
لكن اذا عم نبحث عحل سريع فبتصوري هاد اسرع حل لنلاقي نتيجة....قريبة
تقبلو تحياتي

[hutteen love story]

طول عمره حطين بدون ملعب وطول عمره حطين بدون مصاري اتوقع انو هالنقطتين لا تاثير كبير لهم عالوضع وانما امور اخرى 0بتمنى انو ينحكى عليها بعد الدوري

[Saeedoo]

شكرا" خالد عموضوعك

أكيد الوقائع اللي ذكرتها كلا صح ...من غياب الاستقرار الإداري لغياب الملاعب لغياب الإخلاص والافتقار للمواهب ...إلخ

كل هالأمور بتدعي للحزن وخيبة الأمل مارح قول للتشاؤم ...

بس أنا برفض النظرة الإنهزامية والتشاؤمية هيك

نحنا ماعمنطالب ببطولة دوري ولابكأس أسيا ..بيكفينا فريق محترم يكون بيخوف الفرق التاني ينافس إذا قدر على بطولة الدوري أو الكأس بس عالقلية لا ينافس عالهبوط للدرجة التانية

للأسف الفرق التانية صايرة تخاف حطين عتاريخو وليس أداؤو ...حطين قبل كان يخوف أقوى الفرق ..بس حاليا"..!!

بدنا فريق ما يخسر من الشرطة بتلاتة ..مع المجد بتلاتة ...
بدنا فريق نحس لاعبينو عميلعبو بروح ...ما عمتفرجو عالطابة هية وعمتدخل الكول

هل هذا لا واقعية ..!! ..هل هذا صعب للغاية ...؟؟!؟

بعتقد أنو أبدا ما صعب والدليل أنو لاعبيننا قادرين يلعبو وقت اللي بدهم..وقت اللي بحسو حالهم تحت ضغط و خطر ...وبالعكس بيفشلو لما بكونو مرتاحين ومدللين ..!!
هيدا هو الواقع للأسف

مباراة القرداحة ..سبحان الله أنا كنت متفاءل وكل لاعبي حطين مع أنو كانت مباراة صعب بس فعلا" ربحو الشباب ..لأنو لعبو بدمهم ...
للأسف مبارح بلعبة الشرطة كان واضح اللامبالاة بالفريق خصوصي بالشوط التاني ...يا زلمة طابة بتمر للدفاع وعرضيات بدون ما يدخل حدا يغطي ...
خط وسط الفريق مفروض يرجع كلو مع هجمات الفتوة بينما كانو عنا عميتفرجو ..!!

بالجانب الأخر كان فريق الشرطة عميدافع بعشر لاعبين ويهاجم ب خمس لاعبين عالأقل ..كيف ما بعرف
في إصرار وحماس للفوز ونشاط بالملعب ..عكس فريقنا اللي بتحس أنو سلم أسلحتو بالشوط التاني و خلاها على الله

برجع لموضوعك وبقول أني صدقوني إذا هلق رضينا بهالوضع بكرا رح نرضى بالدرجة التانية وبعدو رح نرضى بحل النادي ...ونقول ...هاد هو الواقع

وبختم بقوله تعالى : (إن الله لايغير ما بقومٍ حتى يغيرو ما بأنفسهم )

صدق لله العظيم

[أبو ناظم]

أخي خالد ما عاد بتذكر التاريخ بالضبط بس من شي 20 سنة كنت واقف على سور النادي و بعيني شفت اللاعبين عم يبكوا بعد نزولنا على التانية و بعيني شفت العزم من قبل المدرب "و الله ما عاد اتذكرت اسمو" و وعدو ان رح نرجع على الاولى لو كانت الفكرة هيك من عشرين سنة لو كنا بهالمنطق من عشرين سنة ما كنا مرينا بفترة التسعينات اللي لامسنا اللقب فيا اكتر من مرة و كنا بعبع الفرق

التغيير من عنا و بخالف كل مين بيقول ان المشكلة بالجمهور "جمهور الحوت حوت"

الجمهور هو الجاجة (اسف على التعبير) اللي رح تبيض بالمستقبل عارف و سيد و بشار تاني و رح تطلع مرة تانية شخصيات مسؤولة متل الطويل و الشخيص و جمهور متل ابو حميد الله يرحمو

لما بتتراكب علينا شغلتين:
1. الانهزامية.
2. الاستخفاف بالجمهور.

فصدقوني معناتا هي هي النهاية

شكرا كتير خالد لرأيك و سعة صدرك و اسف بتأخيري بردي نتيجة الامتحانات

و يحيا الحوت

[Kh@led]

يمكن الروح الانهزامية اتملكتني .. بدون ما حس .. بس للاسف هل الشي بيكون نبع من ملامستي للواقع الحطيني من الداخل ..و لاول مرة بحياتي ..بس موضوعي عبارة عن نتيجة لعمل سنة كاملة بنادي حطين ..
بعتقد انا طرحت الحل البسيط يلي هو نصنع قوال جديدة او نرجع نفتح مصنعنا يلي وقفو الحطينين بايديدون ...بس اما طريقة تحقيق هل الحلين .. فهي بدنا مؤتمرات عالمية لتتحقق

[ابو الليل]

السلام عليكم

ماتركتنا نحكي ولا كلمة خلودة

قلت السطور ومابينها

[أبو هشام الحطيني]

كل شي الو بداية و الو نهاية

بس مع كل نهاية بيخلق يوم جديد

[hutteen my love]

كلامك صحيح خالد واذا بتذكر أنا كنت بعدد من أعداد مجلة حطين كنت بدي نزل مقالة كان عنوانها

عفوا جمهور حطين ولكن هذا هو مستوى لاعبينا

[hutteenvalencia]

ننتظر التجارب الجديدة القادمة بأذن الله

[YOUSEF..MS]

أرسل أصلا بواسطة أبو مروان الحطيني

انا معك بكل كلمة قلتها ...
لازم نرضى بالامر الواقع بس ما لازم ننسى او نتراجع عن هدفنا يلي هو تحسين الواقع..
اللي صار صار ومستحيل نرجع ثانية للوراء
وهلق جميعنا لازم نتكاتف ونوقف مع الفريق وننسى كل المشاكل وكل الهزات اللي مرت بالفريق ونلتفت للمباراة القادمة ياللي هي بمثابة الدوري عندي...

للتوضيح :
لازم نرضى بالامر الواقع : يعني اللي صار صار وما ممكن ابدا نرجع ثانية للوراء ويكون في امل بتغير النتيجة.. ابدا ابدا ....الرضا بالامر الواقع هو انو نلتفت للمباريات القادمة ومالازم نتأثر بنتيجة الخسارة لانو لو اتأثرنا بنتيجة المباراة فالمعنويات رح تهبط والاداء العصبي سيطغي عالفريق ...والمباريات القادمة رح تكون نتائجها اسوأ بكتير من نتائج المباريات السابقة كونو المباريات القادمة اصعب من المباريات السابقة ..
بس انو نرضى بالامر الواقع لحد الاستسلام .. فهادا شي مرفووووووووووووووض لان في الوقت الراهن الحوت بحاجة لتكاتف الجميع .. لحتى نخرج من الازمة اللي نحنا فيها ..وبعدها يخلق الله ما يشاء
المهم ما نسمح لحالنا ولو حتى تفكير بالاستسلام..