:::: ذكرياتنا في اللاذقية ::: للمغتربين

[حطيني مغترب]

بسم الله الرحمن الرحيم

اللاذقية ..... عبق التاريخ وعروس الساحل السوري
مدينتنا الجميلة التي اجبرتنا ظروف الحياة القاسية أن نبتعد عنها ....
ولكنها دائما وابدا تبقى في قلوبنا في كل زاوية من زوايا وكل حي من احيائها
في كل شارع وكل رصيف لنا فيها ذكريات جميلة تشهد بها الاحجار والحيطان والاشجار
نقوش في ذاكرة كل منا لن تمحى ابد الدهر
ولكننا عائدون يامدينتنا ونقسم على ذلك لن نجعل اسوار الغربة تأسر عمرنا القصير
وتمحوا ذكريات الطفولة و طيش الشباب
سنعود قريبا وسيبقى كل شبر من تراب اللادقية الغالي حديث الذكريات
ومن هنا دعوة لجميع الاعضاء عامة والمغتربين خاصة لكتابة ما يجول في خاطرهم من ذكريات جميلة عاشوها في اللاذقية حتى تظل هذه الصفحة ذكرى ابدية نحتفظ بها دائما ونتذكرها سوية عندما تدق ساعة العودة الى الوطن الغالي
ب انتظار ذكرياتكم

حطيني مغترب

[حسن مكيس]

أخوي بشار الحبيب
إن شاء الله الكل بيرجعوا بخير وبصحة وعافية
بدي اسألك حضرتك من رواد مسبح الأبحاث العائلي أو مسبح فشيفش الدولي
أما عن الذكريات عن اللاذقية فأنا ما تغربت لأبعد من الشام بالعسكرية بس والله لما نقرب من الساحل نحنا وراجعين قبل طرطوس ونشم ريحة البحر نحس بحالة غريبة كأنو في شي اتخربط بكيمياء الجسد أو انو الروح رجعت وعلى طول كل يوم بالإجازة نوقع حضور بمسبح فشيفش الدولي وفروعه المعتمدة النبعة الزحليطة الصخرة مينة القصب الدباغة منشان هيك بحب حطين لأنو متل البحر كريم هادي عنيف ودود عصبي بس أكيد ما بيرفض حدا وبيستقبل الكل.
تصبحون على حطين يا مخلصين

[حطيني مغترب]

طالما جبت سيرة فشيفش رح ابدا بهالذكرى الخاصة فيها
اجمل ذكرى عشتها باللادئية وقت الي كنت صغير كان خالي الله يذكرو بالخير يروح يصطاد سمك كل يوم جمعة الصبح بكير واحيانا يصطاد بوريات بعد المغرب
طبعا كنا نتصيد عالغريبة والغبصة والاجاج
كان قضي الليله عند خالي ببيتو (ليلة الجمعة ) كنت ما اقدر نام ولا دقيقة كان خالي عال 12 المسا يجهزلنا القصبات انا وابن خالي و ينام يقلي فيقني الساعة 4 الصبح
كنت ضل انا وابن خالي سهرانين وبس يجي الوقت نفيقو نلبس هلعراقي ناخد معنا هالخبزات اليابسين وننزل عفشيفش واحيانا عالمرفأ طبعا ممنوع الدخول لمين مانكان بس كنا ندبرا هههههه
احلى شي لما نجهز العلفات لهالسمكات ونجيب هالمي عالخبز ونبلش نعجن ونركب الشكومه لهالقصب ونحط الرصاصة وبعدين نعير القصبة عحسب الغمق ونبلش بقا على هالسمكات ايام كنا نصطاد صيد عجيبه اقل شي نطلعلنا ب 3 او 4 كيلات غريبة واحيانا يادوب نجيب نص كيلو
كنا نضل من ال5 الصبح لقبل صلاة الجمعة
واحلى يوم بتذكرو كان لما اصطدت غريبة بتطلعلها شي نص كيلو وبنفس اليوم بعد ماخلصنا صيد رحنا علعبة حطين وربحنا يومتا وبعد الفوز رجعنا تغديناهم للسمكات ببيت خالي
لك ااااااااااااااااااااااااااخ بس الله يرجع هديك الايام

[حسن مكيس]

منطيبك بالك طويل وبتحب الغريبة هههههههههه
والله الصيد ما قدرت عليه بدو طولة بال وانا برأيي أكتر واحد بالو طويل صياد القصبة
بعدين شو غريبة ما غريبة الله يسامحك راس السمك عندي بزرة السلطاني المقلية على العايم مع شوية زيت زيتون ومقرمشة ومعها ليمونة حامضة بس وكوووووووووول والله بيوقفو عندي حساسات الشبع وبصير بشبع على تقدير كمية الحسكات الي أنتجتون بس يصيرو كومة كبيرة بقوم.
نحنة أخوي من جماعة السباحة والراكيت والتسمير والفطور على البحر بس سابقا لأنو ختيرنا ههههه .
الله كريم بترجع الأيام بس فينا نحنة نرجع متل قبل لا هم ولا غم يمكن صعبة شوي.
تصبحون على حطين يا مخلصين

[الامير totti]

ما بعرف شو بدي احكي الصراحة ... هلق ذكرتني بكتير شغلات مرت معي باللادئية خاصة باخر 7 سنين ..يعني من 1999 من يوم دخلت عالجامعة ليوم الي سافرت فيها عالامارات ..... 7 سنين + 3 سنين بفترة الاعدادي .. كانو من اجمل ايام عمري ...وللحديث بقية

[حطيني مغترب]

أرسل أصلا بواسطة حطيني فقط.

منطيبك بالك طويل وبتحب الغريبة هههههههههه

ماعدت طويل بال متل قبل يا غالي الغربة غيرت فيني كتير


والله الصيد ما قدرت عليه بدو طولة بال وانا برأيي أكتر واحد بالو طويل صياد القصبة
بعدين شو غريبة ما غريبة الله يسامحك راس السمك عندي بزرة السلطاني المقلية على العايم مع شوية زيت زيتون ومقرمشة ومعها ليمونة حامضة بس

السلطاني يا غالي ما بيمشي حالو بالقصبة بدو فلوكا وشبك لانو بيعيش بيغمق كتير

وكوووووووووول والله بيوقفو عندي حساسات الشبع وبصير بشبع على تقدير كمية الحسكات الي أنتجتون بس يصيرو كومة كبيرة بقوم.
نحنة أخوي من جماعة السباحة والراكيت والتسمير والفطور على البحر بس سابقا لأنو ختيرنا ههههه .

له يازلمه الشباب شباب القلب
في ناس ميته من قبل ما تولد

الله كريم بترجع الأيام بس فينا نحنة نرجع متل قبل لا هم ولا غم يمكن صعبة شوي.
تصبحون على حطين يا مخلصين

تحياتي يا غالي

[حطيني مغترب]

أرسل أصلا بواسطة توتي حطين

ما بعرف شو بدي احكي الصراحة ... هلق ذكرتني بكتير شغلات مرت معي باللادئية خاصة باخر 7 سنين ..يعني من 1999 من يوم دخلت عالجامعة ليوم الي سافرت فيها عالامارات ..... 7 سنين + 3 سنين بفترة الاعدادي .. كانو من اجمل ايام عمري ...وللحديث بقية

فضفض ابو جعفر فضفض نزل عن زيقك وارتاح

[الامير totti]

بس هلق يحكو اللوادئة شي ..لان بعرف فيه كم واحد رح يقلي انت مو من اللادئية انت طرطوسسسسسسسسسسسسسي

[Almuatar]

والله يا ابو البيش يعني الواحد شو بدو يحكي ليحكي اذا حكى بيئعد بيفتح جروحاتو والله مو ناقصنا بس رح احكيلكون هالطرفة البسيطة صارت معي من شي سنتين انا ونازل اجازة بسيارتي كنت مشتريها جديد ومبسوووووووووط المهم وصلت على حدود سوريا مستوي نعساااان والله من اول ماشفت اول عسكري سوري كأني ردتلي روحي مرح طول عليكون المهم خلصت وراق السيارة ومشيت قبل ماوصل على جبلة في محطة بانزين على اليمين وقفت لحتى عبي بانزين من كتر ماكنت ملهوج وبدي وصل ماعدت شفت قدامي وقفت على طرمبة المازوت بدل البنزين ومن كتر مو جحش الله يعزكون تبع الكازية راح عبى مازوت والله ستر اني لسه أول ماحط الفرد ودعس عليه شميت ريحت الديزل قمت صرخطلت هداك الصوت من كتر الرعبة تبع الكازية شال الفرد تبع المازوت وضل ضاغط عليه وعم يكب بره الدبو وخدلك يامعلم شلون بدك طلع المازوت يلي دخل قول الله ستر اتصلت بواحد صاحبي مكنيكي طلع من الادقية وفكيت دبو البنزين وفضينا ورجاع ركب وعبي ومن هداك الوقت اخدت درس من متل بيقلك ( يامستعجل وقف لئلك)
معلش طولت عليكون وشكرا لبشار لأني بالفعل الذكريات كتير حلوة ...
دعو معي الله يخلصني من البدل منشان انزل مرة تاني ونتمتع ببلدنا احسن من القرف الي عايشين فيه

[حطيني مغترب]

أرسل أصلا بواسطة Almuatar

والله يا ابو البيش يعني الواحد شو بدو يحكي ليحكي اذا حكى بيئعد بيفتح جروحاتو والله مو ناقصنا بس رح احكيلكون هالطرفة البسيطة صارت معي من شي سنتين انا ونازل اجازة بسيارتي كنت مشتريها جديد ومبسوووووووووط المهم وصلت على حدود سوريا مستوي نعساااان والله من اول ماشفت اول عسكري سوري كأني ردتلي روحي مرح طول عليكون المهم خلصت وراق السيارة ومشيت قبل ماوصل على جبلة في محطة بانزين على اليمين وقفت لحتى عبي بانزين من كتر ماكنت ملهوج وبدي وصل ماعدت شفت قدامي وقفت على طرمبة المازوت بدل البنزين ومن كتر مو جحش الله يعزكون تبع الكازية راح عبى مازوت والله ستر اني لسه أول ماحط الفرد ودعس عليه شميت ريحت الديزل قمت صرخطلت هداك الصوت من كتر الرعبة تبع الكازية شال الفرد تبع المازوت وضل ضاغط عليه وعم يكب بره الدبو وخدلك يامعلم شلون بدك طلع المازوت يلي دخل قول الله ستر اتصلت بواحد صاحبي مكنيكي طلع من الادقية وفكيت دبو البنزين وفضينا ورجاع ركب وعبي ومن هداك الوقت اخدت درس من متل بيقلك ( يامستعجل وقف لئلك)
معلش طولت عليكون وشكرا لبشار لأني بالفعل الذكريات كتير حلوة ...
دعو معي الله يخلصني من البدل منشان انزل مرة تاني ونتمتع ببلدنا احسن من القرف الي عايشين فيه

منشان البدل انت خلقان بالسعودية شي ؟؟
واديش صرلك؟

[نديم منلا]

أخ يا أبو البشر ذكرتني بصيد السمك والمرفأ .

أنا ضليت 2 سنتين طول موسم الصيف اقضيه بصيد السمك و أحيانا كان يجي معي فاروق كمان قال مشان يكون وجهو مرزق .

أول سمكة اصطدتها بحياتي كانت سمكة غبص وطار عقلي فيها وقتها وضليت معلقها بالسنارة شي ربع ساعة لحتى يشوفوها كل الصيادين . 36_1_21[1].*

ومرة كمشت سمكة غريبة وأنا عم فكها من السنارة غرزت شوكها بإيدي ويا لطيف شو وجعتني صرت نط وما حط . بعدين واحد صياد جنبي قاللي روح و ..... على إيديك بروح الوجع
بس فكرتو عم يتمسخر علي مشان هيك ما رديت عليه . بعد اكتشفت إنو كلامو صح بس لهلق ما لقيت لهالكلام تفسير طبي .

[حطيني مغترب]

انا بقلك شو السبب بس عالخاص اخوي

[مهند شاويش]

قبل سفري بيومين

ابو صلاح عاشق اليونايتد بيتصل فيني 11 الصبح فيقني من النوم قلي ابو مروان قوم انزل عالطابوشة انا جايب فطاير وابو كابي ناطرنا هنيك

قمت غسلت وشي ولبست تيابي

بسنا ايد الحجة ونزلت من البيت عالطابوشة كان ناطرني ابو صلاح وابو كابي وكانت اركيلتي جاهزة مع كباية الشاي

وابو كمال محشية كان ماسك الرياضية وغاطس

اكلنا وكان فطور بجنن بعدين ابو كمال قرر يلعب مع ابو صلاح كونكان وعينكن ما تشوف الا النور يا شباب الحكي غير الشوف

شو هيدا ابو كمال اسطورة بالكونكان الله وكيلكن كب الجوكر بوشو لابوصلاح اكتر من خمس مرات وانا ما بقا اد ما ضحكت دمعت

بعدين ظبطنا الاراكيل واخدنا المنقل وشترينا بزر من عند ابو ابراهيم وركبنا بالتكسي وبوشنا عالمدينة الرياضية لنحضر لعبة فريق الشباب مع الاتحاد وفزناهن واحد صفر وكنا شلة بتاخد العقل كل الناس نسطلو بمنظرنا اراكيل وبزر وقعدة غير شكل

بنص القعدة بمر ابو احمد من جنبنا بيسلم علينا وبيقعد ورانا ما في عشر دقايق بيجي الاسطورة عارف كان عم يتمرن لحالو بالمدينة كمان سلم علينا وبقي واقف مع ابو احمد شي نص ساعة

المهم يا غوالي رجعنا من اللعبة مبسوطين وبوشي عالبيت تغديت كانت الحجة عاملة غدا مقلوبة لك ااااااااااااااخ على المقلوبة من ايد الحجة اكلت مقلوبة وشربت معها نفس تنبك بجنن قمت صليت ونمت فقت بالسهرة على تليفون عمر شريقي ابو خالد نزلنا تمشينا شوي بعدين رجعنا عالمقر لنلعب تريكس وبيومها ألفت كتاب التريكس واقع وآفاق

[LIVERPOOL 22]

اجمل شيء في اللاذقية صباحا ابو سويس ومساء مطعم حارتنا ونسائنا اراكيل تسمع صوتها عم بربق عن بعد 30 كم وشبابنا في المقاهي ولعب الشدة حتى ساعة متاخرة اما البحر ما أجمل البحر ورائحته تفتح الرئتين والقلب للاذقية سر كبير جدا الله ما اجمل اللاذقية يا شباب شو ما حكينا ما منخلص انشاء الله يا بشارووو تعود انت وجميع المغتربين سالمين وبصحة عالية لانكم انتم اساس اللاذقية

[نديم منلا]

أرسل أصلا بواسطة حطيني مغترب

انا بقلك شو السبب بس عالخاص اخوي

36_1_21[1].* 36_1_21[1].* 36_1_21[1].* 36_1_21[1].*

[الامير totti]

ما خطر في بالي

ذكرى لا يمكن ان انساها ....مع ذكريات كتير باللادئية

يوم الي اتعرفت على ابو كمال محشية وجه لوجه ....طبعا كان النا فترة سنة تقريبا بنعرف بعض من خلال صحيفة حطين بموقع كووورة ... وكان عندي لهفة كبيرة لحتى شوف ابو كمال شخصي بالاضافة لابو كمال الزيدان وخالد وصلاح وماهر وطارق .....الخ .

بس انا خصيت ابو كمال لاني هوي اول واحد بشوفو من الشلة الحطينية وجه لوجه ..وما شاء الله الشوف غير الحكي ... ... وبعدها بساعات تم اجتماع الشلة الحطينية بمقهى الطابوشة العظيم واللي كان اول مرة بدخل على هالمقهى ... ...... هيدي عنجد من احلا الذكريات اللي عندي ... وانا عم بكتب هالرد فيه رفيقي هون قلي يا رجل انت عندك ذكريات كتير ما لقيت غير هالذكرى ...؟؟؟! قلتلو لو بتعرف الشباب ما كنت حكيت هالحكي ... علاقتنا كانت من وار الكمبيوتر والكلمات ولا شي تاني .. مع هيك كنا نحس انو نحنا بنعرف بعض من زمان .. وانا بفتخر اني اتعرفت على اطيب شباب واحلا عالم ... ابو الكمالين .. وصلاح وخالد وطارق وماهر .ومحمد .. ... وما رح انسى ابو عنتر ... بقهوة الطابوشة ... .... وتتالت الزيارات للطابوشة ..

[أبو هشام الحطيني]

اللادئية

حبي الأبدي

للحديث بقية

[Almuatar]

أخوي ابو البشر بالنسبة لموضوع البدل للاسف لم يشملني ولا قرار من القرارات الجديدة في متل بقلك المنحوس منحوس لو علقو على باب ؟؟؟؟ فانوس بئا خليها لربك احسن شي وشكرا على ملاحظتك

[Bouji]

يا شباب بصراحة رغم انو بقضي كتير على الانترنيت و رغم اني بدخل على مواقع سورية كتير بس ما لقيت أحلى من موقع نادينا و لو بعدنا شوي عن انتمائنا لحطين بقول أجمل موقع و منتدى انو اجتمعت فيه مع ناس من مدينتي و يمكن في من حارتي

صحي أنا قليل ما علق و شارك بس بشكل يومي بكون متواجد بالموقع و بقرأ المواضيع و بشوف الناس شو عندها حكي

أنا بعمري ما قعدت بالطابوشة لأني بقعد بشناتا و الزين أكتر و هلق عم اندم اني ما كنت اقعد بالطابوشة لأني أكيد كنت اتعرفت عالشباب الطيبة ... بس الله كريم و الجايات أكتر من الرايحات

بشار بتعجبني مواضيعك كتير و رح حاول شارك بذكرياتي بهالموضوع قدر الامكان

شكرا كتير الكم يا غوالي

[عاشق التبليطه]

خواتي الله يرحم ايام اللي كنا نهرب من مدرسة المالكي ونروح نسلخ صحن فتة من عند ابو سويس ونروح نلعب طابة بنادي حطين بعدين يكعرونا منو نروح على نادي تشرين نلعب طابه هونيك
وكنا كمان ننزل على مسبح التبليطة العائلي بشهر اربعة وشهر خمسة ونكون مخبايين كلاسينا تحت الصخرات نلبسن ونتسبح فين ونطلع ننشف حالنا عالصخرات ونرجع نلبس بدلة الفتوة ونرجع على البيت وكئني شيئا لم يكن مشان هيك اخر شي فتنا معهد هندسي ورحنا تشيعنا بعدين على الامارات